Sot kemi një shtet të rrënuar/ Nuk punon për popullin, por për mafian

28 Nëntor 2017, 14:30, Aktualitet CNA

Dita e Pavarësisë është uruar edhe nga kryetari i ZGJIDHJA-s, Koço Kokëdhima.

Në një postim në rrjetet sociale, Kokëdhima shkruan se në këtë ditë duhet të kujtojmë miqtë që na ndihmuan bujarisht ashtu siç nuk i harrojmë edhe padrejtësitë e mëdha historike dhe tradhëtitë që ju bënë kombit shqiptar.

Gjithashtu Kokëdhima thotë se, ?Sot kemi një shtet të rrënuar dhe të diskredituar që më pak ose aspak punon për popullin dhe për kombin tonë dhe më shumë e përgjithësisht u shërben pushtetit dhe interesave personale të 5 dinosaurëve shqiptarë të mafes së partive që kanë kapur shtetin.?

Postimi i plotë:

Të dashur miq!
Ju uroj gëzuar ditën e 28 nëntorit, 105 vjetorin e shpalljes së Pavarësisë së Shtetit Shqiptar. Në këtë ditë ne kujtojmë me nderim të thellë e përunjësi sakrificat e brezave të shkuar dhe heronjtë tanë në shekuj që dhanë gjithçka për një Shqipëri të lirë, sovrane dhe të pavarur, amanetet e Lidhjes së Prizrenit dhe të Ismail Qemalit. Kujtojmë miqtë që na ndihmuan bujarisht ashtu siç nuk i harrojmë edhe padrejtësitë e mëdha historike dhe tradhëtitë që ju bënë kombit shqiptar. Kjo ditë le të shërbejë si një moment refklektimi për të gjithë shqiptarët, kudo që ndodhen, për pozitën e pamerituar të tyre në Ballkan. Sot kemi një shtet të rrënuar dhe të diskredituar që më pak ose aspak punon për popullin dhe për kombin tonë dhe më shumë e përgjithësisht u shërben pushtetit dhe interesave personale të 5 dinosaurëve shqiptarë të mafes së partive që kanë kapur shtetin dhe ekonominë dhe kanë vënë në dyshim të sotmen dhe të ardhmen e shtetit, të pavarësisë dhe të interesave strategjike t? shqiptarëve në Ballkan e më gjerë. Të ndalemi së ikuri, të marrim përgjegjësinë për fatet tona, të mos i braktisim, boshatisim e dorëzojmë këto troje që na lanë të parët tanë. Së bashku do ta përmbysim këtë elitë të diskredituar tradhëtarësh që kriminalizoi e rrëzoi shtetin tonë dhe do të rindërtojmë të ardhmen e ndritur demokratike të kombit shqiptar në Ballkan, si një partner dinjitoz i SHBA-ve dhe i integruar politikisht e ekonomikisht në Bashkimin Europian. Uroj që ky të jetë përvjetori i fundit pas të cilit Shteti Shqiptar do të çlirohet nga mafia e partive dhe do të reformojë zgjedhjet, do t?i hapë rrugë zgjedhjeve themeluese të shtetit demokratik që fatkeqësisht u mohuan prej 25 vitesh. Gëzuar!/ CityNews