Tufinë , 350 mijë lekë prenotimi i varrit/ Varrezat e Tufinës me vende të rrethuar me kangjella , por bosh

23 Tetor 2017, 20:33, Aktualitet CNA

Në varrezat e Tufinës deklarohet se nuk ka më vende, por po të paguash 350 mijë lekë, punonjësit mund të të gjejnë një hapësirë boshe. Fiks Fare denoncoi skandalin me zë e figurë në varrezat e Tufinës, duke sjellë fakte sesi bashkëpunojnë punonjësit, të cilët kanë rrethuar vende, duke i kamufluar si varre, por që në të vërtetë janë bosh dhe u jepen atyre që paguajnë bakshish.

Për të vërtetuar rastin flagrant, gazetarët e Fiksit, fillimisht kontaktuan me rojën e varrezave, i cili tregoi se në varreza ka vende të rrethuara me kangjella si varre, të cilat janë bosh, por që për këtë duhet folur me brigadierin, (përgjegjësin).

?Ja i rrethuar me kangjella, është kot ai. E ka rrethuar, e ka bërë gati ai, atë gurin e ka vënë kot. E kupton? Ose merr këtë këtu na. Kjo bosh është. Ja ky këtu. Ti foli qysh kshu, e kam gjet si vend, mu te rruga te pisha. foli Besimit. Ja ku i ke, një, dy. Ik bëja porosi tashti se..?, i thotë roja gazetarëve të Fiksit, duke u treguar vendet që janë rrethuar si varre, por në të vërtetë janë bosh dhe disa prej tyre janë prenotuar nga persona të tjerë.

Pas takimit me rojën, gazetarët e Fiksit takojnë edhe përgjegjësin, i cili pranon se vende ka, por janë të zëna nga të tjerët. Fiksi kontaktoi sërish me rojën në telefon.

Gjatë një bisede telefonike, roja i tha Fiksit se ka folur me përgjegjësin dhe mund të shohin një vend që ka zgjedhur për të, por duhet folur me pronarin që e ka rrethuar, i cili thotë se e kishte prenotuar më herët për një njeriun e tij, por që tani do e shesë.

Pasi gazetarët shohin vendin, pronari i vendit të prenotuar kërkon 350 mijë lekë, ndërsa punëtori u kërkon që të bëhet bordura për ta rrethuar. Gjatë bisedës, pronari i vendit kërkon kapar dhe gazetari i Fiksit i thotë se ka 90 mijë lekë të vjetra. Pronari dhe punëtori i varrezave pranojnë të marrin 90 mijë lekë derisa të ndërtohet bordura që do rrethojë vendin. Punëtori i varreve i thotë gazetarëve se pas ndërtimit të bordurës do i marrë në telefon gazetarët e Fiksit që t?i japin edhe 260 mijë lekë.