web counter
LEXO PA REKLAMA!

SHKARKO APP

App Store
Google Play

E fundit!

x

Nga Kastriot MYFTARAJ/ Ëndrra e Lulit

7 Gusht 2017, 14:44, Aktualitet CNA

 

Në Shqipëri kur ndryshon kryetari i një partie, ka një tregues të sigurt për atë se kur kryetari i ri e fiton kontrollin mbi partinë, nëse arrin ta fitojë. Partia përkatëse nis të quhet me emrin e tij në fjalorin informal popullor, por edhe në media. Kështu, Partia Socialiste, e cila dikur quhej Partia e Nanos, sipas emrit të kryetarit të saj Fatos Nano, nisi të quhet Partia e Edit, pak kohë pasi Edi Rama e zëvendësoi Nanon në postin e kryetarit.

Partia Republikane, e cila quhej Partia e Godos, nisi të quhet Partia e Mediut pak kohë pasi ky e zëvendësoi Sabri Godon në krye të partisë. PBDNJ, e cila dikur quhej Partia e Melos, nisi të quhet Partia e Dules, shpejt pasi Vangjel Dule e zëvendësoi Vasil Melon në krye të partisë. LSI vazhdon të quhet Partia e Metës edhe pasi ky dha dorëheqjen nga posti i kryetarit tre muaj më parë, dhe me siguri kështu do të vazhdojë të quhet sa kohë të ekzistojë si parti.

Partia Demokratike që nga fillimet e saj nisi të njihej si Partia e Berishës apo e Saliut, varësisht sipas simpatisë apo antipatisë për liderin e saj të atij që po e përmendte. Megjithëse që prej katër vjetësh Lulzim Basha ka zëvendësuar Sali Berishën në postin e kryetarit të partisë, duke fituar dy palë zgjedhje në parti me 90% të votave, PD-në akoma nuk e quajnë Partia e Lulit apo Partia e Bashës. Kjo tregon se rezultati i dy palë zgjedhjeve në parti është një mashtrim i madh. Basha jo vetëm që nuk është bërë dot lider në parti, por ai shihet si një outsider në parti.

Lulzim Basha ka një ëndër. Ëndrra e tij nuk është që të fitojë një palë zgjedhje parlamentare si kryetar i PD-së, këtë ai as nuk e ëndërron. Ëndrra e tij është që PD-në të nisin ta quajnë me emrin e tij. Ndonëse thellë-thellë ai është i bindur që sado të rrijë në postin e kryetarit të PD-së, nuk ka gjasa që partia të quhet me emrin e tij, si Partia e Lulit, ose Partia e Bashës. Sado zgjedhje në parti të fitojë Basha me 90% të votave, ato nuk e bëjnë atë që ta ketë partinë nën kontroll. Basha kontrollon vetëm selinë e partisë, jo partinë.

PD nuk mund të bëhet kurrë Partia e Lulit, ose Partia e Bashës, sepse ai nuk ka qenë kurrë Luli apo Basha i partisë. Ai ka qenë një outsider që u katapultua në poste të larta në parti, në një moment kur Berisha donte të sillte fytyra të reja në parti, ashtu si pronari i një butiku nxjerr disa manikinë të rinj në vitrinë. Luli është një manikin politik në zyrën e kryetarit të PD-së.

Ironia e madhe është se më shumë mundësi ka që PD të fitojë nofkën Partia e Kunatit të Lulit, se Partia e Lulit. Se në fakt është kunati i Lulit që e kontrollon vulën e partisë, duke qenë se kontrollon Lulin. Dhe vula e partisë është shumë fitimprurëse për kunatin e Lulit dhe për vetë këtë të fundit./CityNews





Lajmet e fundit nga