E fundit!

20:58 Aktualitet

FOTOLAJM/ Pankartat "pikante" në protestën e 46 kundër qeverisë

Vijon protesta e 46 para Kryeministrisë. Protestuesit vijo...

Çfarë nuk fitoi Lulzim Basha

18 Maj 2017, 16:21, Aktualitet CNA

Partia Demokratike ka bërë publike të gjithë marrëveshjen e firmosur me kryeministrin Edi Rama, e cila në fakt është një bashkëqeverisje me ministrat teknikë, ku PD merr dhe shumë nga institucionet në vend. Militantët e Bashës po e shpallin fitore bashkëqeverisjen me socialistët dhe me LSI e çamët e PDIU, të cilët nuk dalin nga qeveria.

Pra, do të kemi një qeveri me bazë të gjerë, ku forcat kryesore janë PS dhe PD, kjo e fundit do përfaqësohet me ministrat teknikë, por do të vendosë disa drejtorë të përgjithshëm, të cilët mund t?i përdorë si suport gjatë fushatës.

Për Bashën dhe shumë militantë kjo marrëveshje politike e 18 majit është një fitore. Por, çfarë ka humbur Lulzim Basha dhe cilat janë ato që ai nuk i realizoi dot në 90 ditë ngujim në çadër?

Së pari, kërkesa dhe kushti kryesor ka qenë largimi i Edi Ramës nga kryeministër. Në fakt, Edi Rama do të vazhdojë të jetë kryeministër i vendit dhe i ministrave teknikë të Lulzim Bashës.

Kërkoi shtyrjen e zgjedhjeve. Ka këmbëngulur vazhdimisht të jetë shtatori apo tetori data e tyre. Ndërkohë, zgjedhjet u shtyn vetëm një javë.

Së treti, mund të përmendim kushtin e panegociueshëm të Bashës, qeverinë teknike. Nuk e kemi, thjesht janë shtuar gjashtë ministra teknikë nga PD.

Kërkoi votim elektronik, por nuk e mori. Do votohet siç është votuar gjithmonë.

Kërkoi numërin elektronik, por nuk e mori. Do numërohet siç janë numëruar gjithmonë.

Kërkoi identifikim biometrik, por nuk e mori.

Këto janë disa nga pikat kryesore, që sipas tij, garantonin zgjedhje të lira dhe të ndershme për shqiptarët. Të gjitha këto i këmbeu me gjashtë ministra dhe katër drejtorë.

Më tej, ka marrë kreun e KQZ, por mazhorancën e kanë të majtët. Ka marrë Avokatin e Popullit, që tashmë nuk i duhet askujt. Procesi i Vettingut po shkon drejt përfundimit.

Të gjitha reformat e tjera, ato të Republikës së Re dhe që zgjidhin të ardhmen e vendit, përfshi reformën kushtetuese, zgjedhore, etj, do të bëhen në legjislaturën e ardhshme, çka do të thotë pas zgjedhjeve.

Në përfundim, nga kjo analizë e thjeshtë na rezulton se Lulzim Basha lëshoi çdo kërkesë thelbësore për garantimin e zgjedhjeve, mori disa ministra dhe disa drejtorë, që në fakt për çadrën dhe militantët demokratë duhet të quhet tradhti e tij, sepse iu premtoi ato që nuk i mori.

Pra, Basha po shpall fitoren e radhës, kur nuk ka fituar asgjë. Gënjeshtrën e ka shpallur fitore, jo për kundërshtarët, por për të tijët./CityNews