E fundit!

08:13 Kosova & Bota

Britania planifikon kufizime gjatë natës në rrjetet sociale për adoleshentët

Qeveria britanike ka njoftuar plane për të vendosur kufizi...

Replikë nga Elvi FUNDO/Korça përtej Niko Peleshit dhe fasadave

15 Mars 2017, 11:02, Aktualitet CNA

Lexova një shkrim të zv/kryeministrit Niko Peleshi, ditët e fundit, që shpaloste punët e qeverisë dhe të tijat në Korçë, pa harruar edhe kryebashkiakun Sotiraq Filo.

Një shkrim, që fliste për punët e tij dhe ata që s?ja pëlqenin për arsye politike, dhe zhvillimin apo ndryshimin e madh që kishte qyteti juglindor.

Unë personalisht e shoh Korçën në ritëm zhvillimi dhe ndryshimi prej shumë kohësh, jo kur Peleshi u bë zv/kryeministër, por kur ishte në bashki dhe me fondet e qeverisë shqiptare. Me një kredi të Ministrisë së Financave u hodhën hapat e fundit të mbylljes së një investimi madhor, siç ishte infrastruktura nëntokësore, ujësjellës, kanalizime. Investim në themelet e shtëpisë, që është meritë e ish-kryebashkiakëve, Peleshit, ministrit Bode dhe qeverive Nano e Berisha.

Por, Peleshi këtë e kalonte si një fjali dhe merrej me pazarin, qendrën kulturore, fushat sportive, bibliotekën, muzeun e kështu me radhë. Një fakt që tregon se ai ka pasur qëllim të qartë të investojë në sektorin turistik të qytetit dhe këtë ta propagandojë për interes elektoral, kur jemi në ditë fushate jo zyrtarisht. Vetëm kaq, pasi pjesën tjetër e ka gjetur gati.

Peleshi nuk flet në shkrimin e tij për investimet e bëra gjatë qeverisjes së mëparshme, kur Korça thithi qindra milionë euro investime ne infrastrukturë, arsim, shëndetësi etj. Ndërsa sot bëhen vetëm fasada lokalesh, që mbushen në fundjavë dhe thjesht ndriçohen gjatë javës.

Unë jam si Vasoja që flet zv/kryeministri. Parku në Korçë është i mrekullueshëm, por kushtoi miliona euro. Me aq shumë para dhe gjendjen që kishte mund të ishte investuar në disa shkolla për ngrohjen e femijëve në fillim, që këtë vit u plevitosën korçarçe.

Pazari është vërtet i bukur, mua më pëlqen më shumë se zv/kryeministrit. Familja ime ka edhe një pronë aty, por përpara 4 milionë dollarëve në Pazar, Korça kishte nevojë për çerdhe dhe kopshte, për qendra shëndetësore, etj. etj, më pas të tjerat.

Shtëpia mund të jetë e bukur nga jashtë, por korçarët e kanë zakon, kur del dimri rregullojnë çatinë dhe jo banjën apo dhomën e gjumit.

Një shkrim që zv/kryeministri kërkon të reflektojë punën e tij, që ka bërë në qytet, dhe kjo nuk mohohet. Korça ka pasur investime, në Pazar dhe park, edhe në disa rrugë, por ka pasur edhe një kullë betoni në qendër, që si duhet as djallit e jo më qytetit. Është një çiban i ngulur që hedh poshtë çdo investim në funksion të turizmit në qytet. Korça ka disa ballkonë si ish-kampin e punëtorëve, por edhe pikën turistike të Moravës. Për pasojë, Kulla ishte thjesht aventurë lartësie për të shëmtuar një shesh.

Duke mos e zgjatur shumë, vërtet Muzeu, siç thotë zv/kryeministri, është vlerë dhe ka dalë në një revistë, por zoti Peleshi, përballë tij qëndron një spital që po shkatërrohet, që s?ka specialistë, që mbijeton falë heroizmit të qytetarisë dhe një personeli për t?u admiruar. Po kalbet spitali dhe ju përballë ndërtoni muze. Ndoshta kujtoni se përpara se të vdesin duhet të shikojnë ikonostaset për të shkuar te Zoti, edhe kjo është një zgjidhje.

Nuk po e shtoj më tej me bibliotekën apo ndërtesën përpara qarkut, sepse ky është një debat dhe përplasje që unë e kam pasur me ju shumë vite më parë. Ata që e bëjnë sot janë të vonuar, dje kanë qenë shërbëtorët tuaj, sot ju sulmojnë se i latë të pakënaqur.

Në fund, mësojeni publikisht, po Korça ka investime dhe ka ndryshuar, mua më pëlqen dhe më e bukur dua të bëhet, jam kundërshtari juaj në bindje, por qytetin e dua sa ty e në mos më shumë. Vetëm diçka mos e harro, qyteti nuk është fasadë. Qytetin e bëjnë qytetarët, të cilët në Korçë janë në nivelin maksimal të papunësisë, qytetin e bën dija, kultura dhe tradita që po humbin çdo ditë pa ndalim. Korça ka nevojë për gjëra shumë më elementare, se sa milionat e eurove në parqe dhe fasada. Ato janë të bukura, por thjesht kaq, brenda çdo shtëpie në Korçë ka papunë, varfëri, mjerim, pa folur për plagët e pronave dhe dhimbje të tjera sociale.

Dritat janë të bukura por barku nuk mbushet me drita dhe fasada.

Ju do ngeleni në historinë e atij qyteti më besoni si Nikoja që ndërtoi Kullën, muzeun, etj etj, por kurrë nuk do të jeni dot Turtulli që ndërtoi Senatoriumin. Ky besoj nuk është cinizëm./Shkruar për Citynews