Skandali me pastrimin e parave para reformës/ Politikanë dhe gjyqtarë nxjerrin jashtë vendit mbi 30 milionë euro, identifikohen 411 raste

18 Shkurt 2017, 07:40, Aktualitet CNA

Reforma në drejtësi ka futur në panik gjithë kastën e korruptuar të politikës dhe të drejtësisë shqiptare. Frika e vetingut dhe ngritja e SPAK, ka bërë që të gjithë të tentojnë të fshehin të ardhurat dhe pasuritë e tyre. Si kurrë më parë, gjatë vitit 2016 ka pasur një rritje të ndjeshme të dërgimeve jashtë vendit të të ardhurave, përmes llogarive të ndryshme bankare.

Pak ditë më parë, në Kryeministri u mblodh Komiteti i Bashkërendimit të Luftës kundër Pastrimit të Parave dhe në të është prezantuar një raport nga Drejtoria e Parandalimit të Pastrimit të Parave, ku vihet re se gjatë vitit 2016 ka pasur një rritje të ndjeshme të pastrimit të parave dhe dërgimit të parave jashtë vendit. Sipas këtij raporti të siguruar nga gazeta Sot, vitin që lamë pas janë shënuar 411 raste të dyshimta, për të cilat DPPPP ka kërkuar ndërhyrjen e prokurorisë dhe të policisë, por mësohet se janë shënuar dhe shumë raste të tjera. Interesant është fakti se në 2016 ka pasur gati një dyfishim të llogarive me vlera shumë të larta, të cilat janë identifikuar nga Drejtoria e Pastrimit të Parave.

Sipas raportit, janë bllokuar në total 29 milionë euro, ndërsa në 2016 kanë qenë rreth 16 milionë euro, pra dy fish më pak. Por dyshohet se vlera reale e dërgimeve jashtë vendit është më e madhe se 30 milionë euro. Edhe pse raporti nuk e jep arsyen se përse një rritje kaq e ndjeshme, interesant është fakti se gjatë 2016 u miratua reforma në drejtësi dhe dyshimet janë se të gjithë, si prokurorë, gjyqtarë e politikanë kanë tentuar të dërgojnë jashtë vendit parat e tyre, me shpresën se nuk do të gjenden. DPPPP ka zbuluar vetëm një pjesë të tyre, por sipas burimeve nga ky dikaster, ka dhe shumë raste të tjera që nuk janë bërë përmes bankave.

Në një raport tjetër të publikuar pak ditë më parë, thuhej se një pjesë e madhe e parave që dalin jashtë vendit, dalin edhe përmes doganave. Një pjesë e madhe e parave janë bllokuar dhe janë identifikuar disa persona me peshë. Kjo do të thotë se me nisjen e vetingut, shumë gjyqtarë e prokurorë do e kenë pisk punën.