"Ngujimi" për karrigen e Lulit

18 Shkurt 2017, 18:47, Aktualitet CNA

PD protestoi sot përpara kryeministrisë, Lulzim Basha kërkoi zgjedhje të lira dhe ftoi mbështetësit e tij të qëndrojnë aty derisa të kishin zgjidhje. Një aksion me vlerë për opozitën në rast se do ishte i vërtetë dhe i sinqertë. Por nuk duket të jetë i tillë.

Lulzim Basha ka gati katër vite në opozitë dhe ska bërë asnjë ditë opozitën. Ai ka qenë në gjumë dhe apatik. E vetmja opozitë ka qenë ajo e Berishës në parlament dhe rrjete sociale. Opozita e Bashës ka qenë më deklarata nga selia e PD dhe kaq. I pasuar nga disa “të rinj” të paaftë dhe të mefshtë Basha ka ofruar një opozitë të dobët dhe pa thelb.

Sot protesta dhe ngujimi do kishin vlerë në rast se Basha në katër vite kishte zhvilluar betejat e qytetarëve çdo ditë. Në rast se Basha do kishte protestuar për varfërinë që se bëri kurrë, i braktisi shqiptarët dhe i la në duar e mjerimit të ofruar nga Rama, do ishte në tjetër pozicion. Nuk ishte krah tyre kur arrestoheshin e burgoseshin për 30 mijë lekë drita. Nuk ishte në krah të qytetarëve kur ju vidhej dhe shkatërrohej prona, nuk ishte në krah të shqiptarëvë kur arrestoheshin dhe dhunoheshin, nuk ishte në krah të shqiptarëve kur Shqipërinë e mbuluan koncesionet. Vërtet Lulzim Basha nuk ishte, por ai e quan opozitë edhe fjalimet bosh e pakuptim të spikerave nga foltorja blu. Basha nuk ishte dhe nuk bëri opozitë katër vite, atë e filloi sot. Basha sot kërkon zgjedhje të lira dhe kujtohet 4 muaj përpara zgjedhjeve. Nuk e ka bërë dhe nuk i ka kërkuar në katër vite.

Protesta e tij do ndiqej nga shqiptarët në rast se ai në katër vite kishte pasur si qëllim kauzat e tyre, jo kauzën e tij personale.

Lulzim Basha sot zhvilloi një protestë për karrigen e tij dhe jo për zgjedhjet. Ai kërkon të shpëtoje edhe duke destabilizuar vendin, vetëm që të mos lëshojë karrigen e kreut të PD.

Basha e di mjaft mirë që është i humbur, që zgjedhjet nuk i fiton dot. Po ushtron një presion dhe tenton një destabilitet pa vlerë për të ardhmen e tij politike. Ai foli për zgjedhje të lira ose zgjedhje nuk do kishte duke paralajmëruar bojkot ose prishjen e tyre. Në fakt PD ka hyrë në zgjedhje edhe në vitin 1997, ka rënë nga pushteti me dhunë dhe është kthyer me vota, tani duket se po kërkon pushtet nëpërmjet destabilitetit, per të siguruar karrigen e Bashës në krye të PD.

Ky është problemi real i veprimit të sotëm, që është aksion opozitar i cili mungoi në katër vite dhe sot fatkeqësisht bëhet për karrigen e Lulit në krye të PD dhe jo për shqiptarët./Albin Bora