E fundit!

08:01 Kosova & Bota

Ari bie pavarësisht inflacionit të lartë në SHBA, ekspertët shpjegojnë arsyet

Ari po shkon drejt muajit të katërt radhazi në rënie, pava...

Zbardhen detajet/ Berisha kundërshton bojkotin e Bashës

16 Janar 2017, 16:04, Aktualitet CNA

Grupi parlamentar i Partisë Demokratike është mbledhur sot nën drejtimin e kreut të saj Lulzim Basha.

Gjatë diskutimeve në grup ka pasur qëndrime të ndryshme për sa i përket aksionit politik të opozitës, sjelljen e saj kundrejt qeverisë dhe pjesëmarrjen në parlament dhe në zgjedhjet e 18-qershorit.

Burime brenda PD thanë për citynews se nënkryetari i PD, Edmond Spaho ka kërkuar bojkotin e plotë të parlamentit, të komisioneve hetimore dhe pjesëmarrjen në zgjedhje.

?Të bojkotojmë parlamentin, të braktisim komisionet parlamentare dhe e zgjedhjet e 18 qershorit?, tha ai

Ndërkohë, edhe nënkryetari i PD, njëkohësisht kryetari i grupit parlamentar të PD, Edi Paloka, ka shprehur qëndrim për bojkot për të rritur presionin ndaj ndërkombëtarëve.

Deputeti Genc Ruli është shprehur se data e zgjedhjeve duhet të shtyhet për të garantuar normalitet në votime.

?Për të pasur zgjedhje normale ja vlen të shtyhet data e zgjedhjeve?, tha Ruli

Të njëjtin qëndrim për bojkotin parlamentar ka pasur edhe sekretari i PD, Arben Ristani.

Të katërt deputetët e mësipërm kanë pasur një linjë të njëjtë, duke i kërkuar kryetarit Lulzim Basha bojkotin e parlamentit.

Por, gjatë diskutimeve ka pasur edhe qëndrime të kundërta me bojkotin. E para që ka ndërhyrë ka qenë deputetja Majlinda Bregu, e cila në mënyrë ironike ka pyetur nëse bojkoti dhe presioni ndaj ndërkombëtarëve do të zbatoheshin nëse Komisioneri për zgjerim Johanes Hahn do ti kërkonte Bashës për të hyrë në zgjedhje?.

? Unë nuk jam për të dalë nga parlamenti. A jemi të sigurt se jemi gati për protesta? Nëse Johanes Hahn do të telefononte kryetarin për tu future në zgjedhje, a do ti qëndronim bojkotin dhe presionin ndaj ndërkombëtarëve?, mësohet të ketë thënë Bregu

Edhe ish-kryeministri dhe lideri demokrat, Sali Berisha, ka theksuar se PD në asnjë rast nuk duhet të dalë nga parlamenti sepse aty duhet të jetë sheshi i betejës.

Berisha tha se PD braktisi për 6 muaj parlamentin, fitoi ligjin për dekriminalizimin, por në fakt rezultatet e saj ishin një vrimë në ujë.

Ai theksoi se PD i ka fituar betejat edhe për zgjedhje të lira kur ju ka treguar njerëzve rrugën dhe ka organizuar strukturat e saj.

Në të njëjtën linjë ka qenë dhe ish-nënkryetarja e Kuvendit , Jozefina Topalli, e cila në fjalën e saj ka qenë pro qëndrimeve të Berishës duke theksuar se PD ka hyrë në zgjedhje edhe në vitin 1997 kur nuk shkonte në gjysmën e Shqipërisë, por u imponua në zgjedhje dhe me zgjedhje fitoi.

Topalli është shprehur se PD duhet të vazhdojë betejën parlamentare dhe të shkojë në bazë dhe tek qytetarët për të shfrytëzuar situatën e favorshme sepse sipas saj Edi Rama është në ditët më të zeza. Ajo theksoi se PD duhet të reagojë fort në parlament dhe të shkojë në zgjedhje, të cilat janë një betejë që demokratët nuk duhet ti shmangin.

Ajo tha se PD ka pasur 3 vjet e gjysëm kohë në opozitë për të luftuar Edi Ramën dhe për të riorganizuar strukturat për një përballje fituese./citynews