E fundit!

10:21 Aktualitet

PD bojkoton sërish seancën

Partia Demokratike ka bojkotuar edhe seancën e sotme në pa...

Nga Kastriot MYFTARAJ/A ishte vrasja e ambasadorit rus në Turqi një atentat gulenist, me Aleppon si false flag?

20 Dhjetor 2016, 07:51, Aktualitet CNA

Disa detaje-kyç të rrjedhës së ngjarjeve në atentatin ndaj ambasadorit rus në Turqi, tregojnë se bëhet fjalë për një atentat gulenist, me false flag (flamur të rreme), për të adresuar autorësinë diku tjetër.
Fakti që ambasadori rus në Turqi u vra në një veprimtari publike (ekspozitë pikture), nga një oficer i Policisë Turke që kishte mundur të hynte si pjesë e stafit të sigurisë dhe madje të qëndronte pas shpinës së ambasadorit, kur ky do të ishte duke folur, tregon se akti terrorist nuk mund të ishte i një organizate si ISIS, aq më pak i organizatave terroriste kurde. Asnjë prej tyre nuk ka ndikim në forcat turke të sigurisë që të mund të arrijë një qasje të tillë. Të vetmit që e kanë një ndikim të tillë janë gulenistët, të cilët edhe pas spastrimeve që janë bërë ndaj tyre, me rastin e grushtit të shtetit të korrikut, ruajnë megjithatë një ndikim jo të pakët në hierarkinë e shtetit turk.
Sot një konflikt ruso-turk iu intereson të gjithë armiqve të Erdoganit, që nga kurdët, te gulenistët, te ISIS, ky i fundit i armiqësuar veçanërisht me Erdoganin për shkak të miqësisë së re Erdogan-Putin. Por vetëm gulenistët janë në gjendje që të organizojnë një atentat në atë mënyrë, ndaj ambasadorit rus.
Atentatori turk e shpalli aktin e tij si të kryer për protestë ndaj atyre që po ndodhin në Aleppo. Kjo më tepër ngjan si false flag (flamur i rremë) për të fshehur autorësinë e atentatit terrorist. Aleppo u përmend me qëllim që qeveria turke të mos e sjellë dot aktin si provë të terrorizmit gulenist.
Forcat shtetërore të sigurisë turke, ndonëse mund ta kishin kapur të gjallë atentatorin, qoftë edhe duke e plagosur atë për ta neutralizuar, parapëlqyen ta vrasin atë, duke e mbyllur përjetësisht gojën e tij. Atentatori ishte i vetëm, i izoluar në vendin e krimit dhe, ndonëse ishte i armatosur, ai mund të neutralizohej pa shumë vështirësi. Merret vesh, dikush brenda forcave turke të sigurisë nuk ka dashur që atentatori të mbetet gjallë dhe të flasë.
Këto janë problemet e Turqisë, por që mund të bëhen shpejt edhe problemet tona. Shqipëria, që strehon një lëvizje të gjerë guleniste, gjendet në rrethana kur këtu mund të ndodhin akte të ngjashme terroriste, guleniste, me flamur të rremë, duke u bërë vendi jonë fushëbetejë e dy forcave turke, gulenistëve dhe erdoganistëve, kauzat e të cilëve nuk na përkasin asnjëra.