Basha: Një betejë e përmasave epike na pret në meidanin e historisë

12 Shtator 2016, 18:07, Aktualitet CNA

Kryetari i Partisë Demokratike Lulzim Basha, ish kryeministri Sali Berisha, deputetë, anëtarë të familjes Hajdari, kryetari i FRPD Belind Këlliçi e qytetarë të shumtë zhvilluan homazhe pranë memorialit të Azem Hajdarit në 18 vjetorin e vrasjes së Heroit të Demokracisë.

Vepra e Azem Hajdarit, tha kryetari i Partisë Demokratike Lulzim Basha, është në radhë të parë vepra e kurajos, për tu çuar dhe për tu përballur me të keqen. Vepra e Azem Hajdarit është po kështu kujtesa, sot në këtë 12 Shtator që përkon edhe me ditën e Kurban Bajramit, se liria dhe demokracia marrin frymë vetëm përmes sacrificës.

Fjala e kryetarit të Partisë Demokratike, Lulzim Basha pranë memorialit të Azem Hajdarit.

E nderuara familja Hajdari

Të nderuar miq

E sotmja është një ditë homazhi dhe nderimi për Azem Hajdarin. dhe mikun e tij Besim Çera. Azem Hajdari është ndër të paktët njerëz që kanë ndryshuar me jetën dhe veprën e tij historinë e Shqipërisë. Dhe është edhe ndër më të paktët që e kanë ndryshuar atë për mirë. Tribuni i studentëve, të cilët në Dhjetor të 1990, përmbysën me kurajon e zemrave të tyre diktaturën, u vra pabesisht 18 vite më parë këtu në këtë vend, pak metra para selisë së Partisë Demokratike.

Jeta e tij ishte e shkurtër por kujtimi i tij do të jetë i përjetshëm. Kujtimi i tij na jep kurajo, guxim dhe vendosmëri. E sotmja është një ditë e zezë për politikën shqiptare. Është dita kur politika dhe krimi u bënë njësh sepse politika në aleancë me krimin u kthye në politikë në shërbim të krimit. Politika në shërbim të krimit prodhoi traumën e madhe kombëtare, sulmin e madh ndaj vlerave themelore të demokracisë dhe shtetit ligjor, zhytjen e Shqipërisë në kriminalitet, pasiguri dhe vrasje të Heroit të Demokracisë Azem Hajdari.

Ndaj e sotmja është po kështu një ditë apeli për çdo shqiptar pavarësisht bindjeve politike që të mos pajtohemi me politikën e inkriminuar, të mos pajtohemi me inkriminimin e politikës, për demokratët e në veçanti për rininë demokrate, e sotmja është një ditë kushtrimi.

Një betejë e përmasave epike na pret në meidanin e historisë. Edhe njëherë kujtimi i Azem Hajdarit, vepra dhe kurajoja e tij janë në krahun tonë. Ai vetë si një engjëll mbrojtës në krahun e rinisë demokrate në këtë betejë që duhet e do të fitohet me çdo çmim. Shqipëria e kartelit të drogës, Shqipëria e politikës së bërë njësh me krimin, vuan në papunësi, pasiguri, varfëri e mungesë lirie që thellohet nga dita në ditë. Vepra e Azem Hajdarit është në radhë të parë vepra e kurajos, e kurajos për tu çuar dhe për tu përballur me të keqen. Vepra e Azem Hajdarit është po kështu kujtesa, sot në këtë 12 Shtator që përkon edhe me ditën e Kurban Bajramit, se liria dhe demokracia marrin frymë vetëm përmes sakrificës.

Lavdi përjetë Azem Hajdarit! Azem ti je gjallë!