E fundit!

10:21 Aktualitet

PD bojkoton sërish seancën

Partia Demokratike ka bojkotuar edhe seancën e sotme në Pa...

Fluturimet drejt Italisë/Në treg një operator i ri low cost

1 Gusht 2016, 10:19, Aktualitet CNA

Falimentimi i Belle Air në tetor të 2013-s, operatorit që kishte gjysmën e tregut të fluturimeve ajrore në vend, la një hapësirë të madhe tregu. Belle Air kishte si destinacion kryesor Italinë, duke operuar si low cost, me çmime 10-30% më të lira se konkurrenti direkt Alitalia. Ishte pikërisht ky I fundit që mori pjesën më të madhe të tregut të lënë bosh. Në lojë hyri dhe Blue Panorama, si operator low cost.

Muajt e fundit, AlItalia shkurtoi rrugët dhe rriti ndjeshëm çmimet, me 60-70%, nga 140-150 euro në 240 euro e më lart, duke zemëruar konsumatorët.

Ndërkohë konkurrenca po rritet. Një pjesë e pasagjerëve po zgjedhin për të udhëtuar me Blue Panorama, për shkak të çmimeve dukshëm më të lira të lira, ndërsa një operator tjetër i ri, Fly Ernest sapo ka hyrë në treg, duke reklamuar tarifa të lira.

Operatorët low cost po ofrojnë aktualisht çmime shumë më të lira se AlItalia, megjithatë për shkak të numrit të kufizuar të destinacioneve që ato ofrojnë, Alitalia vijon të dominojë.

Por, le të shohim sa kushton një biletë drejt Milanos , në fund të shtatorit, nëse do ta prenotonim sot.

Me AlItalia, bileta avajtje-ardhje nga Milano Malpensa (me tranzit nga Roma), rreth datave 18 dhe 22 shtator, alternativa më e lirë kushton 239 euro.

Me Blu Panorama, bileta në datat 18-20, vajtje ardhje në Milano, kushton 131 euro. Nëse kombinon datat (psh 20 shtator me 24 shtator), mund të gjesh bileta edhe me 115.77 euro.

Me operatorin e ri, Fly Ernest, mund të gjesh biletë vajtje në datën 18 shtator për 58.5 euro dhe kthim në datën 22 shtator për 31.1 euro, në total vajtje-ardhje 89.9 euro (çmimi minimal ky, pa opsione shtesë), nga Tirana në aeroportin e Bergamos, duke e bërë atë alternativën më të lirë për të udhëtuar drejt Milanos.

Ndryshe nga tendenca europiane që këtë verë po sheh ulje të ndjeshme të biletave ajrore (edhe 4 euro), në Shqipëri çmimet janë rritur ndjeshëm muajt e fundit. Në fillim të muajit prill 2016 AlItalia rivendosi kontrollin mbi sistemin e rezervimit. Teknikisht kjo nënkupton që agjencitë nuk kanë më mundësi të ndërhyjnë me klasin e udhëtimeve (më parë agjencitë ndërhynin në sistem duke shitur një pjesë të madhe të biletave me klasin më të lirë). Kjo solli një rritje të menjëhershme të çmimeve, me 60-70%, dhe sot drejt Italisë, (desinacioni i gjysmës së pasagjerëve) vështirë sot se gjen biletë nën 200 euro për çfarëdolloj destinacioni.

Edhe në raport me rajonin, biletat janë disafish më të shtrenjta. Nga Shqipëria drejt Europës, biletat janë minimalisht 50% më të shtrenjta, edhe kur bëhet fjalë për të njëjtët operatorë, psh me Austrian Airlines. Në destinacionet që në aeroportet e Shkupit e Podgoricës operohen nga kompani low cost, si Milano, Venecia, Londra, qytetet e Gjermanisë, çmimet nga Rinasi janë disa fish më të shtrenjta./Monitor