Aksident i rëndë në aksin Gjirokastër-Kakavijë/ Tre të vdekur, mes tyre dy fëmijë të mitur

24 Korrik 2016, 12:45, Aktualitet CNA

Tre persona, një grua dhe dy fëmijë kanë mbetur të vdekur dhe 9 janë të plagosur, mes tyre 3 në gjendje të rëndë, nga të cilët 2 fëmijë nga një aksident në aksin rrugor Gjirokastër- Tepelenë.

Viktimat janë efektivja e policisë Albana Hasanaj 38-vjeçe, Luan Hasanaj 18-muaj dhe Dorjen Dedja 2 vjeç.

Ndërsa me helikopter në Tiranë janë transportuar të plagosurit Leombra Hasanaj, Ened Gjyli dhe Irfan Hasanaj.

Në Tiranë me ambulancë po transportohen 5 të plagosur Hasan Dedja, Genci Sherifi, Kejdi Gjyli, Entel Gjyli dhe Pajtesa Hasanaj.

Ndërsa në spitalin e Gjirokastrës jashtë rrezikut për jetën ndodhet Aida Hasanaj.

Në mjetin tip ?Nisan? po udhëtonin Irfan Hysenaj, që është transportuar në Tiranë në gjendje të rëndë dhe fëmija Dorjen Dedja 2 vjeç, që humbi jetën.

Ndërsa në furgonin e drejtuar nga Hasan Dedja, po udhëtonin 10 persona, efektivja e policisë Albana Hasanaj 38-vjeçe dhe Luan Hasanaj 18-muaj që humbën jetën dhe 8 personat e tjerë të plagosur, të gjithë të afërm.

Ngjarja ka ndodhur në kthesën e fshatit Mashkullorë në orën 14:00, rreth 4 km në veri të qytetit të Gjirokastrës. Dy automjetet, janë përplasur shumë fort me njëra-tjetrën aq sa ka shkaktuar vdekjen e tre personave dhe lëndimin e 9 të tjerëve. Makina tip furgon gri me targa AA760LI, vinte nga jugu, ndërsa automjeti tjetër tip Nissan me targa greke ZH75095 nga veriu në drejtim të jugut.

Mësohet se në furgonin gri, udhëtonin 10 persona, 2 prej të cilëve humbën jetën ndërsa në automjetin me targa greke, udhëtonin 2 persona, shoferi dhe një fëmijë 2-vjeç, që humbi jetën.

Viktima Albana Hasanaj, punonjëse e policisë në Drejtorinë e Përgjithshme, po udhëtonte në furgon së bashku me burrin e saj, Hasan Dedja ish- Drejtor i Krimit Ekonomik në Policinë e Shtetit, i liruar nga detyra. Ishte pikërisht burri i viktimës, Hasan Dedja që po drejtonte furgonin, ndërsa Albana Hasanaj ishte në vendin e parë dhe përplasja ka rezultuar fatale.

9 të lënduarit, janë transportuar fillimisht me urgjencë për në Spitalin e Gjirokastrës, nga të cilët 3 u transportuan me helikopter në Tiranë, 5 po transportohen me ambulancë dhe një është jashtë rrezikut në Gjirokastër. /citynews/