Incidenti/ Bushati- Nishanit: Sqaro shkeljen e ceremonialit të shtetit

16 Korrik 2016, 16:54, Aktualitet CNA

Ministri i Jashtëm, Ditmir Bushati ka reaguar në lidhje me incidentin e ndodhur një ditë më parë në Presidencë, për ceremoninë me ambasadorët, e cila u anulua nga Presidenti.

Përmes një postimi në rrjetet sociale, ministri Bushati shprehet se Presidenti Bujar Nishani duhet të sqarojë opinionin publik për këtë veprim të paprecedent në shkelje të ceremonialit të shtetit.

Sipas tij ceremoniali i shtetit nuk lë shteg për interpretime partiake, por siguron mirëkuptimin dhe bashkëpunimin midis institucioneve.

Bushati kritikoi ashpër Presidentin Nishani, për të cilin tha se është në kërkim të konflikteve të vockla dhe hesht për çimentimin e kulturës së korporatës në drejtësi.

Deklarata e Ditmir Bushatit

Për shpërfillësit e ligjit dhe frikacakët nga reforma!

Habitem se si një President që ka mesatarisht 2-3 këshilltarë për çdo çështje (përfshirë ato protokollare), nuk sqaron opinionin publik për veprimin e tij të paprecedent në shkelje të ceremonialit të shtetit dhe praktikës së konsoliduar diplomatike shumëvjeçare, por preferon të keqpërdor tellallët e vend strehimeve politike.

Ceremoniali i shtetit, si pika e vetme e referimit për protokollin e shtetit që siguron mirëkuptimin e bashkëpunimin midis institucioneve, është fare i qartë. Ai aplikohet njësoj për Presidentin, Kryetarin e Kuvendit, Kryeministrin, Ministrin e Punëve të Jashtme. Ceremoniali nuk lë shteg për interpretime partiake, e as për trajtim privat të institucioneve shtetërore.

Koha e trajtimit të trupit diplomatik mbi bazën e “vendeve të rezervuara” ka perënduar që kur shqiptarët me votën e tyre të lirë e nxorën në opozitë partinë e zotit President. Trupi diplomatik nuk është ?mërgata e qyqeve? dhe as e ?qokatarëve?, por një trupë e një shërbim që punon për interesat e vendit e qytetarëve.

Keqardhje për Presidentin në kërkim të konflikteve të vockla, që hesht dhe pranon çimentimin e kulturës së korporatës në drejtësi. Është mendësia e korporatës, në shpërfillje të plotë të rendit demokratik, që tregojnë me gisht mbi 93% e shqiptarëve sot. Së bashku me partnerët tanë ndërkombëtarë, të cilët nuk kanë investuar pak në këtë proces jetik për vendin.

Keqardhje për ?amnezinë presidenciale? ndaj paranojës së partisë së zotit President për reformën në drejtësi, që po e çon këtë të fundit gjithnjë e më shumë drejt instikteve e metodave izolacioniste të Doktorrit, i cili, për hir të interesave të pushtetit dhe familjes së tij, u konfrontua me popullin dhe botën atlantike.

Zoti President, çlirojeni veten nga përdorimi i funksionit publik si pronë private dhe partinë tuaj nga paranoja e ?rrezikut euro-amerikan?, çlirojeni veten dhe partinë tuaj nga sindroma e qarramanit, sepse për Shqipërinë çështja më madhore mbetet miratimi i reformës në drejtësi.