Nga Kastriot Myftaraj/ Fjalimi i Ramës në Shkollën e Magjistraturës dhe qeshja masive e auditorit me shakatë antiopozitare të Kryeministrit

15 Korrik 2016, 19:09, Aktualitet CNA

Edi Rama në një fjalim para studentëve të Shkollës së Magjistraturës për t? iu përgjigjur thënies së ambasadorit amerikan Lu, se Edi Rama dhe Lulzim Basha duhet të takohen ditën e hënë dhe të rrinë atje të mbyllur deri kur të arrijnë një marrëveshje për miratimin e reformës në drejtësi.

?Rama, duke komentuar thënien e ambasadorit Lu, u shpreh se:

Megjithatë, edhe sikur të ishte një kërkesë e SHBA-ve, këtë nuk e pranoj dot që të mbyllem përjetë me Bashën në një dhomë? Ruajna Zot! Nuk e di çfarë do të ishte. Pastaj të mbash Bashën përjetë brenda dhe të lësh Saliun jashtë, çfarë konsensusi mund të bësh? Të paktën ai duhet të hyjë e të dalë, sepse duhet të merret vesh me Saliun. Nejse, kjo është shaka, por gjysmë e së vërtetës. Shaka është, kështu që Sali mos u shqetëso! Mos u shqetëso se ti je aty në kullë rehat. Thua nuk ka konsensus, ik përballohu vetë, bëj si të duash. Kjo është prova jote e zjarrit. O me mua, o me reformën.?

Auditori i përbërë nga studentë të Shkollës së Magjistraturës qeshi me të madhe disa herë në ndërkohë që Rama po bënte këto shaka antiopozitare.

Unë kam thënë shumë herë se Sali Berisha duhet të arrestohet dhe të dënohet me burg për bëmat e tij kur ishte në pushtet. Këtë vit, për rreth gjashtë muaj rresht një herë në javë e kam mbrojtur këtë mendim në televizion.

Por në atë që ndodhi sot para studentëve të Shkollën e Magjistraturës ka një problem të madh. Sot Kryeministri i bëri një atentat rendit kushtetues dhe bashkëpunëtorë të tij ishte turma e studentëve.

Shkolla e Magjistraturës nuk është si Fakulteti Juridik, studentët e të cilit mund të merren me politikë. Studentët e Shkollës së Magjistraturës janë jurist me diplomë që në përfundim të studimeve titullohen magjistratë dhe shteti ka detyrim t? u gjejë punë si gjykatës, prokurorë.

Studentët e kësaj shkolle janë gjyqtarët dhe prokurorë e së nesërmes. Si të tillë e kanë të ndaluar me ligj të jenë anëtarë të partive politike dhe të merren me çfarëdo veprimtarie politike, qëkurse janë studentë në këtë shkollë, jo pas përfundimit të saj. Si juristë ata sigurisht e dinë këtë gjë. Shkolla e Magjistraturës është e depolitizuar, njëjtë si Akademia e Policisë, si Akademia e Mbrojtjes.

Edi Rama ka shkelur ligjin e depolitizimit që është në fuqi që nga viti 1991, duke mbajtur një fjalim të tillë para studentëve të Shkollës së Magjistraturës fjalim ku ironizoheshin kundërshtarët politikë. Rama e dinte shumë mirë që po shkelte ligjin duke vepruar kështu, por ai e bëri këtë sepse është bërë arrogant nga mbështetja ndërkombëtare, amerikane dhe europiane që ka. Vetë studentët kanë shkelur ligjin duke i miratuar fjalët e Kryeministrit me qeshjen e tyre masive. Studentët e dinë shumë mirë këtë, sepse ata janë juristë të diplomuar që para se të hynë në këtë shkollë.

Me fjalimin që Rama mbajti para auditorit të studentëve të Shkollës së Magjistraturës, ai përgënjeshtroi fjalët që thotë për reformën në drejtësi. Fjalimi i Ramës ishte i një njeriu që kërkon t? i marrë nën kontroll institucionet e Drejtësisë, për t? i përdorur si armë në dobi të fuqizimit të pushtetit të tij personal. Nesër ata studentë do të marrin emërime dhe do të bëjnë karrierë varësisht se sa e fuqishme ka qenë e qeshura e tyre miratuese ndaj fjalëve të Kryeministrit Rama.

Gjatë këtyre 20 viteve që ekziston Shkolla e Magjistraturës, as Berisha kur ka qenë President, as Nano, as Meta, kur ky ka qenë kryeministër, as Majko, nuk kanë keqpërdorur Shkollën e Magjistraturës si auditor për fjalime politike.

Prandaj ndërkombëtarët që mbështesin Ramën, amerikanë dhe europianë, kanë detyrim që të shprehen pas fjalimit të tij. Sepse ajo që ndodhi përbën një skandal të madh. Sepse pas këtij fjalimi të Ramës nuk mund të na thonë më se reforma në drejtësi ka qëllim rregullimin e institucioneve të drejtësisë.

Berisha dhe Basha nesër mund të largohen nga Shqipëria bashkë me familjet e tyre dhe të shkojnë të jetojnë në mënyrë komode me paratë që kanë në vende që nuk do t? i ekstradojnë kurrë, pra nuk do t? ia dorëzojnë kurrë shtetit shqiptar për një gjyq eventual ndaj tyre. Por në këtë vend do të mbetemi ne të tjerët që jetojmë këtu, dhe që nuk duam të kemi institucione drejtësie ku gjyqtarë dhe prokurorë janë ata që zgërdhiheshin me shakatë mediokre të Ramës. Të gjithë studentët e pranishëm në takimin me Ramën që e përcollën me qeshje masive fjalimin e tij duhet të përjashtohen nga shkolla. Edhe drejtuesit e shkollës duhet të largohen nga detyra për shkelje të ligjit, që nuk ndërhynë për t? i tërhequr vërejtje Kryeministrit.