E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Referendumi në PS: 21% votë kunder ose bojkot/ Një votim simbolik

10 Prill 2016, 19:12, Aktualitet CNA

Më 9 prill 2016 u zhvillua referendumi në Partinë Socialiste. Pyetja e referendumit lidhej me mandatin e kryetarit të partisë, i cili sipas statutit 2011 ka skaduar që prej shtatorit 2013. Me vendimin të Kongresit të PS (19.3.2016) u miratua statuti i ri, sipas të cilit, përgjatë kohës kur partia fiton zgjedhjet parlamentare dhe ka kryeministrin, kryetari i partisë nuk votohet. Referendum lidhej pikërisht me këtë ndryshim statusor, dhe pritej të kishte mbështetje maksimale. Kritikët e referendumit në PS e bojkotuan atë (përfshirë dy deputetët Blushi e Hafizi), kurse pjesa tjetër e partisë e mbështeti dhe nxiti pjesëmarrjen në votime. Për shkak se në proces nuk pati grupe monitorimi të paanshme që të mund të deklaronin detaje, mbeten në fuqi deklarimet zyrtare të ardhura nga selia e PS.

Të dhënat zyrtare tregojnë se 84% e socialistëve me të drejtë vote morën pjesë në votim dhe vetëm 16% e bojkotuan atë. Nga votuesit 94.9% ishin pro propozimit të ardhur nga kreu i PS dhe Kongresi, për ta lidhur mandatin e kryetarit të partisë me qenien e tij si kryeministër. Pjesa tjetër prej 5.1% ishte kundër, pra votoi për variantin statutor të vitit 2013, sipas të cilit kryetari votohet periodikisht në parti.

Nga të dhënat teknike të dala nga selia e PS, (bashkimi i atyre që bojkotuan dhe atyre që votuan kundër), rreth 21.1% e anëtarësisë së PS ishin kundër lidhjes së mandatit të kryetarit me qenien kryeministër. Rezultati më i thellë pro kryeministrit ishte në Shkodër (98% pro dhe 88% pjesëmarrje), kurse rezultati më i dobët rezulton në Gjirokastër me rreth 29% votues kundër ose bojkotues të votimit.

Vlera e referendumit të PS është vetëm simbolike. Nuk pati fushatë, nuk pati alternativë të dytë, nuk kishte një tematikë me interes publik, nuk e zgjidh krizën në PS midis shumicës që mbështet linjën zyrtare dhe pakicës që ka qëndrim kritik, si dhe nuk arriti dot të konkludojë me një proces transparent dhe të pakontestuar. Vlera simbolike lidhet me faktin se për herë të parë kemi një referendum në një parti politike shqiptare dhe me siguri, do të ketë raste të tjera të ngjashme në të ardhmen./politike.al