“Kam rrogë ditore 1800 euro”, lirohet pasuria e majme e ish-zyrtarit

21 Shkurt 2016, 21:46, Aktualitet CNA

Ish-drejtori i spitalit ?Shefqet Ndroqi? (Sanatoriumi), Rezar Oketa, po hetohet nga Prokuroria e Tiranës për një tender për blerjen e aparaturave mjekësore. Muajt e fundit, drejtoria e Parandalimit të Pastrimit të Parave, ka referuar në njësinë Task-Forcë disa transferta të Oketës, ndërsa me urdhër prokurori, këto llogari bankare janë sekuestruar. Ish-zyrtari ka kundërshtuar vendimin e prokurorisë, duke i kërkuar gjykatës lirimin e këtyre pasurive. Gazeta ?Shqip? ka siguruar vendimin e gjykatës, e cila ka zhbllokuar këto pasuri. Para gjyqtarit, Oketa ka paraqitur disa kontrata pune me disa firma të huaja, ku paga e tij arrinte deri në 1800 euro në ditë. Në një tjetër kontratë, Oketa ka përfituar rreth 1500 euro, ndërsa bashkëshortja e tij, është paguar gjatë një viti me 150 mijë euro.

Dyshimet për aferë
Prokuroria ka regjistruar procedimin penal me nr.9912 të vitit 2015. Gjatë seancës gjyqësore rezultoi se Drejtoria e Përgjithshme e Parandalimit të Pastrimit të Parave, me disa shkresa të datës 18 dhjetor 2015, ka lëshuar urdhrin në një bankë të nivelit të dytë për bllokim të përkohshëm të transaksioneve të shtetasit Rezart Oketa. Rezultoi se më datë 14 dhjetor po të vitit të kaluar, në llogarinë e ish-zyrtarit ka mbërritur një transfertë në vlerën 135 645 euro. Kjo transfertë është dërguar nga Lihteshtejni, po nga llogaria e tij me shënimin ?mbyllje llogarie?. ?Nga informacioni në burime të hapura, rezulton se shtetasi Rezart Oketa është i përfshirë në aferë korrupsioni për të ashtuquajturin ?tender? i aparaturave mjekësore për spitalin universitar të sëmundjeve të mushkërive ?Shefqet Ndroqi?. Sipas të dhënave, rezulton se në vitin 2009, Rezart Oketa ishte drejtor i spitalit ?Shefqet Ndroqi?. Ai dhe bashkëshortja e tij, Milda Nanushi, janë pjesë e organikës së Fakultetit të Mjekësisë, përkatësisht pjesë e seksionit të shërbimit të Kirurgjisë së Përgjithshme dhe Fiziologjisë?, thuhet në vendimin e gjykatës.

Transaksionet bankare
Gjykata ka argumentuar se në emër të Rezart Oketës dhe të bashkëshortes së tij, ka transaksione të vlerave. Sipas saj, më 20 prill 2010, i ka shitur një shtetaseje një pasuri prej 63 milionë lekësh të vjetra. Në janar 2011 ka blerë një automjet rreth 80 milionë lekë, ndërsa në 2014 ka shituar një automjet BMW X6 në vlerën 50 mijë euro. Më 3 qershor 2014 i ka shitur një shtetasi një automjet 30 mijë euro, ndërsa në nëntor po të atij viti ka marrë një hua 100 mijë euro. Sipas gjykatës, në intervalin kohor 2010-2015 ka kryer transaksione, si tërheqje, pagesa për leasing, depozitime etj., në banka të ndryshme në shuma që arrijnë deri në 100 000 euro.
Gjykata ka listuar së në mars 2012, në një bankë të nivelit të dytë është kryer këmbim valutor në shumën 84 milionë lekësh të vjetra. Në dhjetor 2012 është tërhequr një shumë prej 25 mijë eurosh, më 10 prill 2014 janë tërhequr 100 mijë euro për blerje e pasurisë së paluajtshme. Në shtator 2014, familja ka derdhur 38 mijë euro në një llogari të një firme private. Bashkëshortja e Oketës, ka blerë një automjet në 2014 për 30 mijë euro, ndërsa në 2015 e ka shitur 28 mijë euro.
Në vendimin e gjykatës thuhet se, nga verifikimi në QKR në emër të këtij çifti, rezulton se Rezart Oketa është aksioner në një firmë me objekt import-eksport të produkteve dizinfektuese.

?1800 euro në ditë?
Për këtë çështje ka kryer hetime edhe prokuroria, ku ka rezultuar se Rezart Oketa ka nënshkruar në datën 15 gusht 2009 aktmarrëveshjen me shoqërinë ?M?? ltd, duke e emëruar atë këshilltar për një afat 18-mujor, me një pagë ditore 1800 euro/ditë në maksimum deri në 180 000 euro gjithsej. Gjykata thotë se Rezart Oketa edhe bashkëshortja e tij, Milda Naushi, kanë nënshkruar kontratë me ?A? International? sh.p.k me seli në Vjenë Austri. Oketa, më datë 1 prill 2012 ka nënshkruar kontratë me këtë shoqëri me afat 2-vjeçar për të kryer shërbime konsulenti të kësaj kompanie në Shqipëri dhe Kosovë me një pagë prej 1500 euro/ditë pune që mbulon edhe tarifën e infrastrukturës dhe zyrës së tij. Kjo kontratë është rilidhur përsëri më datë 12 janar 2015 me të njëjtat kushte si ajo e mësipërmja. Sipas gjykatës, edhe Milda Nanushi ka lidhur me këtë shoqëri më 10 shkurt 2014 një kontratë për të kryer shërbime këshilluesi të kësaj shoqërie për një afat njëvjeçar me tarifë shërbimi gjithsej 150 000 eurosh, ku 75 000 euro për menaxhimin e projektit dhe shërbimeve këshillimore dhe 75 000 euro për shërbime këshilluese dhe inxhinierike. Gjatë shqyrtimit gjyqësor, rezultoi se janë paraqitur disa fatura nga shoqëria që i ka paguar. Në gjykatë, prokuroria tha se ka arritur në konkluzionin se burimet e parave të sekuestruara janë verifikuar si të ligjshme. Prokuroria ka qenë dakord për heqjen e sekuestros dhe kthimin e shumave të të hollave të sekuestruara Rezart Oketës dhe Milda Nanushit. Në fund, gjykata tha se çmon se në rastin në gjykim vërtetohet ligjshmëria e të hollave dhe duhet të hiqet sekuestroja e pasurisë, duke u kthyer këtyre personave të gjithë shumën./Gazeta Shqip