E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Televizionet : Ose progres ose epokë e gurit !

22 Nëntor 2015, 08:37, Aktualitet CNA

Nga Artan Fuga

Nga studimi i procesit të tranzicionit dixhital konstatoj se operatorët televizivë shqiptarë nuk po e kuptojnë ende se ku ndodhet bota e sotme e transmetimeve televizive.

Operatorë kombëtarë, privatë apo publikë, si edhe operatorë lokalë, nuk po e kuptojnë se kanë hyrë në fillimin e fundit të televizionit sikurse e bëjnë atë sot.

Dixhitalizimin e transmetimeve televizive po e shohin më shumë si një imponim që Europa e plakur dhe autoritare, si një plakë lagjeje, po u bën djemve plot iniciativë e çamarrokë të Ballkanit, veçanërisht të Shqipërisë dhe Kosovës.

Mendojnë se cështja qenka thjesht për të rritur dividentin dixhital që na lypset për të fituar euro duke ja dhënë me qira ose shitur te operatorët e telekomunikimit.

Edhe më shumë, në një mosbesim total ndaj shtetit, dhe shpesh me të drejtë, mendojnë se shteti kërkon të duket si nxënës i bindur para Brukselit dhe prandaj po u imponon një proces që sipas tyre nuk qenka i nevojshëm.

Duke fjetur mbi arritjet teknologjike të kaluara, të dhjetë viteve më parë, harrojnë se ajo teknologji tashmë ka dalë pothuajse fare nga loja dhe shumë shpejt do të na mbysi të gjithëve, ne si telespektatorë dhe ata si operatorë.

Televizioni analog ka mbaruar,

edhe televizioni analog i kaluar pa formatim të ri në platforma dixhitale duke u izoluar nga kanalet dhe modet e tjera të konvergjencës teknologjike e ka mbaruar rolin e vet.

Të gjitha perandoritë e vjetra janë shembur pikërisht sepse kanë fjetur gjumë mbi arritjet e tyre të shkëlqyera në të kaluarën.

Zgjohuni mo se ka ardhur ora e fillimit të mbarimit!

Mos harroni se mediat e reja asnjëherë nuk i kanë bërë operatorët e vjetër. Ose transformim ose do t’ua zënë vendin të tjerët.

Harrojnë se audiencat po ikin drejt platformave të konvergjuara të “pure players” që prezantojnë emisione në streaming ose si televizione në internet, ose si televizione multikanale, apo si televizione të parjes me vonesë, për të parë në mënyrë jolineare miliona emisione që konservohen në “retë”.

Harrojnë se në kushtet e tregut të hapur, një investitor i huaj mund të vijë dhe të investojë duke konverguar shërbime multiplekse dhe propozuar buqeta televizionesh me cmime qesharake duke marrë të gjithë audiencën operatorëve të hutuar e përgjumur tashmë shqiptarë.

Me çfarë do të mbroheni, apo me hushta dhe helmeta!!!

Harrojnë se operatorët telekomunikativë në Shqipëri vetëm një hap i ndan nga investime në produksione televizive jolineare.

Mos harrojnë se midis prodhuesve të programeve dhe audiencave tani ka mundësi të ketë lidhje direkte duke mos qenë të detyruar të kalohet patjetër nëpërmjet nëpërmjet operatorëve televizivë. Stacionet televizive mund të anashkalohen nga audiencat të cilat me shëbime interneti mund të kenë akses direkt në imazhe televizive dhe programe televizive pa pagesë.

Me cfarë do të investoni në televizionin analog ose në platformat dixhitale thjesht televizive ?

Me tendera, me reklamën që ju ka braktisur, me audiencën që nuk është budallaqe të paguajë, me cfarë?

Nuk e shikoni si jeni politizuar deri në palcë???

Vetëm emisione me kosto margjinale prodhoni.

Nuk është cështja te kontrata ose paga e gazetarëve sikurse mendojnë krejt gabim disa. Sot politizimin e bëjnë gazetarët e superpaguar dhe me superkontrata.

Mjerimi qendron te menaxhimi i kompanive televizive. Pak rëndësi ka paga e gazetarit këtu.

Ekonomia informale po shkatërron Shqipërinë.

Sot çështja shtrohet jo midis televizionit analog dhe televizionit numerik.

Harrojeni.

Sot çështja shtrohet :

Ose televizion numerik në transmetimit toksor të integruar me shërbimet e tjera telekomunikacioni ose pa televizion fare.

Televizioni si i tillë, jo vetëm ai analog, po ndjen fillimin e fundit.

Jeni duke humbur trenin e fundit!

Zgjohuni!

Nuk është çështja vetëm te biznesi tuaj që është në rrezik, por te kultura shqiptare, te identiteti kombëtar, te informacioni i qytetarit që do të rrëzohet më keq sesa është – atje qendron cështja.

Dëgjojini këmbanat e studjuesve se ju duan të mirën, nuk sigurohen interesat financiare duke ngelur mbrapa në format e biznesit e shtrenguar fort pas monopolit të arritur dikur si rrjet kombëtar ose lokal.

Ose progres ose lamtumirë televizion që është bërë në programacion, informacion, një media e plakur si ndërtesë e shqyer e kohës të komunizmit.

Rrezikojmë të kthehemi në epokën e gurit!