E fundit!

21:38 Aktualitet

“Rama jepe dorëheqjen”/ Protestuesit marshojnë në rrugët e kryeqytetit

Pas fjalimeve para Kryeministrisë, protestuesit kanë nisur...

Reagimi i qeverisë për tenderin e sterilizimit

21 Nëntor 2015, 17:36, Politikë CNA

Ashtu siç përmend edhe deputetja Vokshi në deklaratën e saj, administrimi i repartit qendror të sterilizimit është me të vërtetë 1.3 milionë euro, por që nga momenti që është kryer investimi në 2007-2008 e deri më sot nuk është vënë as edhe një ditë të vetme në punë. Pikërisht për këtë qëllim, duke parë edhe mungesën e plotë të njohurive për të vendosur në punë atë repart, si dhe duke u nisur nga siguria e pacientit dhe e jetës së njeriut kur ai hyn në sallën e operacionit, Ministria e Shëndetësisë mori vendimin për të përmirësuar rrënjësisht situatën problematike të teknologjisë, instrumenteve dhe sterilizimit në sallat kirurgjikale dhe në kabinetet kirurgjikale.

Përqendrimi i investimit në një repart të vetëm me teknologji të lartë është një nga standardet më të fundit të BE-së për proceset e sterilizimit. Autoklavat e shpërndara në sallat kirurgjikale nuk kanë siguruar deri më sot sigurinë maksimale të sterilizimit, bazuar edhe në raportet e ISHP-së, gjatë gjithë këtyre viteve, duke sjellë cenim të sigurisë së jetës së pacientit dhe përhapjen tej normave të lejuara të infeksioneve spitalore.

Në përgjigje të pretendimit të opozitës mbi procedurat e tenderimit, theksojmë se janë kryer të gjitha studimet paraprake të vlerësimit të situatës në të gjithë spitalet e vendit, është konsultuar dhe komunikuar nëpërmjet shkresave me të gjithë drejtuesit e shërbimeve kirurgjikale në shërbimet spitalore universitare, si dhe janë hartuar dokumentacionet përkatëse si studimi i fizibilitetit dhe dokumentacioni standard i tenderit. Sigurisht që ky tender ka qenë i publikuar në portalin online të Agjencisë së Prokurimit Publik, por vlen të përmendet edhe fakti se procesi në fjalë është njoftuar si procedurë prokurimi publike në gazetën prestigjioze ndërkombëtare ?Financial Times?, me datë 13 shkurt 2015. Ndërkohë, partneri privat fitues i këtij koncesioni është një bashkim operatorësh ekonomikë që udhëhiqen nga ?Servizi Italia Spa?, një kompani e kuotuar në bursën italiane dhe me një përvojë 30-vjeçare ndërkombëtare në këtë sektor.

Lidhur me koston financiare të këtij programi, të dhënat e vitit 2013 për QSUT-në dëshmojnë se kostot operative të shpenzimeve mesatare për instrumente kirurgjikalë, sterilizimin e tyre, dezinfektimit të sallës, lëvrimit të veshjeve, si dhe kosto të tjera të lidhura me sallat operatore kirurgjikale për një operacion, janë pothuaj të barabarta me kostot e projektit të ri. Pra, me të njëjtin nivel shpenzimesh, do të ofrohet cilësi maksimale të shërbimeve sipas standardeve të BE-së. Gjithashtu, projekti përmban një investim fillestar në instrumente kirurgjikale dhe makineri e pajisje me vlerë 1.6 miliardë lekë dhe një riinvestim në vitin 2022, i cili në fund të zbatimit të kontratës mbetet pronë e sistemit spitalor publik.