web counter
LEXO PA REKLAMA!

SHKARKO APP

App Store
Google Play

E fundit!

x

Presidenti Putin pret Sekretarin Kerry në Soçi

12 Maj 2015, 18:53, Kosova & Bota CNA

 

Sekretari amerikan i Shtetit John Kerry tha se pati diskutime “të sinqerta” për Ukrainën, Sirinë dhe Iranin me presidentin rus Vladimir Putin të martën, gjatë vizitës së parë të zotit Kerry në Rusi që nga marrëdhëniet e përkeqësuara pas mosmarrëveshjeve të mprehta mes të dy vendeve.

Zoti Kerry i bëri komentet të martën në Twitter dhe shtoi se është “e rëndësishme për të mbajtur hapur linjat e komunikimit mes Shteteve të Bashkuara dhe Rusisë për adresimin e çështjeve globale.”

Para se të ulej për të biseduar me zotin Putin në qytetin turistik të Soçit, zoti Kerry u takua me Ministrin e Jashtëm rus Sergei Lavrov për më shumë se katër orë në atë që ishte vizita e nivelit më të lartë mes Shteteve të Bashkuara dhe Rusisë që kur filloi kriza në Ukrainë.

Departamenti amerikan i Shtetit tha se zoti Kerry dhe presidenti Putin do të diskutojnë “një gamë të gjerë çështjesh dypalëshe dhe rajonale”, duke përfshirë Jemenin dhe Libinë si pjesë e përpjekjeve të vazhdueshme për të siguruar se pikëpamjet amerikane janë përcjellë në mënyrë të qartë.

Zoti Kerry ka të ngjarë të ketë testuar vullnetin e zotit Putin për të bërë separatistët pro-rusë në Ukrainë të zbatojnë një marrëveshje të dobët armëpushimi, dhe mbështetjen e Rusisë ndaj presidentit sirian Bashar al-Asad, forcat e së cilës kanë pësuar humbje kohët e fundit në luftën civile gati katër vjeçare. Shtetet e Bashkuara kërkojnë një tranzicion politik për t’i dhënë fund sundimit 45-vjeçar të familjes së tij.

Udhëtimi i zotit Kerry vjen në një kohë kur marrëdhëniet mes Uashingtonit dhe Moskës kanë rënë në nivelin më të ulët pas Luftës së Ftohtë pas mosmarrëveshjeve në lidhje me Ukrainën dhe Sirinë, dhe udhëtimi duket të jetë hartuar më shumë për të mbajtur kontakte sesa çdo gjë tjetër.

 





Lajmet e fundit nga