Arsimi i Lartë/ Studentët: Protestojmë më fort se kurrë në 23 Prill!

18 Prill 2015, 15:59, Aktualitet CNA

Përmes një deklarate, studentët kanë njoftuar se të enjten, më 23 prill, do të vijojnë protestat kundër ligjit për arsimin e lartë. Ata lajmërojnë se do të marshojnë më të fortë e të qartë se kurrë nga Korpusi drejt kryeministrisë, duke kundërshtuar këtë reformë.

Njoftimi i plotë

Pas dy marshimeve të pazakonta kundër kalimit të reformës skandaloze për studentët dhe universitetin publik, erdh? ora e një marshimi të jashtëzakonshëm dhe vendimtar për rezistencën universitare.

Tashmë, të gjithë janë kundër kësaj reforme! Që nga mijëra studentët e universiteteve dhe konvikteve publike te pedagogët e ndërgjegjshëm, dhe më tej, prindërit, punëtorët, qytetarët dhe intelektualët publikë. Madje edhe burokratët gjer më dje të heshtur dhe të trembur, sot po gjejnë guximin të kundërshtojnë hapur pasojat rrënuese të reformës në fjalë.

Kjo reformë abuzon me paratë publike për universitetin duke ua falur bizneseve universitare private, koston e falimentimit të së cilëve do t?i paguajë studenti dhe universiteti publik. Kjo reformë është klienteliste dhe tregtarizuese dhe si e tillë duhet ndaluar. Lëvizja “Për Universitetin” u qëndron edhe më fort parimeve të saj:
– Jo rritjes së tarifave! Arsim publik falas!
– Jo ndarjes së fondeve publike me universitetet private! Rritje e shpenzimeve shtetërore për universitetet publike!
– Jo burokratizimit të mëtejshëm të universitetit! Demokraci pjesëmarrëse universitare!
– Jo kthimit të dijes në mall! Universitet si vatër e arsyes kritike!

U bëjmë thirrje të gjithë studentëve, profesorëve, gjimnazistëve, familjarëve, fqinjëve të bashkohen në marshimin e radhës KUNDËR KALIMIT TË REFORMËS dhe PËR ARSIM PUBLIK FALAS! Kjo reformë i prek të gjithë, studentët e sotëm dhe të nesërm, ekonominë familjare dhe shtetërore, shtyllën kurrizore të shoqërisë: universitetin! Ky marshim u përket të gjithëve dhe ka për qëllim që përmes pjesëmarrjes sa më të gjerë t?i tregojë qeverisë se përshkallëzimi është i pashmangshëm në rast se tentohet kalimi parlamentar i reformës.

Lajmërojini të gjithë: shoqet/shokët e klasës dhe të konviktit, prindërit dhe të afërmit, fqinjët, miqtë e rretheve familjare dhe punësore, kudo dhe kurdo: me frymë dhe me fletushka, me facebook dhe me parulla, me ç’të mundeni. Do të jetë një ditë e madhe, më e rëndësishmja në përpjekjen shumëvjeçare për arsim publik cilësor dhe emancipues.

Të enjten, më 23 prill, në orën 11:00 marshojmë më të fortë e të qartë se kurrë nga Korpusi drejt kryeministrisë për të thënë: REFORMA NUK KALON! ARSIM PUBLIM FALAS!