Politika gjermane në Lindjen e Mesme

12 Prill 2015, 20:40, Aktualitet CNA

Konfliktet në Lindje të Mesme po përhapen. Por si po pozicionohet qeveria gjermane ndaj Egjiptit dhe pse po e mbështet Arabinë Saudite në konfliktin e Jemenit? Opozita është kritike.

Gati qe një vit është presidenti i Egjiptit Abdel Fattah al-Sisi në këtë post. Tani së shpejti ai duhet të vizitojë Gjermaninë. Ministri i Ekonomisë Sigmar Gabriel ia ka dorëzuar atij në mars një ftesë të kancelares për vizitë në Berlin. Qeveria kështu u largua nga pozicionet e saj të mëparshme, që zgjedhjet parlamentare në Egjipt janë një parakusht për realizimin e vizitës së presidentit. Parlamenti është shkarkuar në vitin 2012 nga Gjykata Kushtetuese egjiptiane. Kur do të mbahen zgjedhjet parlamentare është plotësisht e paqartë. Në Berlin shtrohet pyetja nëse kjo vizitë paraqet ndryshim të politikës gjermane ndaj Egjiptit. Kajron e ka vizituar para Pashkëve edhe kryetari i grupit parlamentar të CDU/CSU Volker Kauder, i cili është takuar me presidentin Sisi. Në një intervistë me Deutsche Wellen ai tha se vizita ka pasur për synim zhvillimin e raporteve ekonomike. “Qeveria egjiptiane është e interesuar që të tërheqë më shumë investorë gjermanë në këtë vend”, thotë ai. Këto përpjekje duhet të mbështeten nga ana e politikës.

Kritika ndaj vizitës së Kauder

Udhëtimi i Kauderit është kritikuar në Berlin. E Majta e ka quajtur këtë dhe viztiën e Gabrielit si të pashijshme. Për qeverinë federale më të “rëndësishme janë raportet ekonomike se të drejtat e njeriut”, tha deputeti Christine Buchholz. Politikani ekologjist Omid Nouripour kërkon një shpjegim për ndryshimin e politikës së kancelares. Nëse zgjedhjet parlamentare nuk lidhen me vizitën e presidentit Al-Sisis në Gjermani, atëherë ai nuk do të kishte kurfarë shkaku të mbajë zgjedhje demokratike. Por ai nuk ka asgjë kundër bisedimeve të drejtpërdrejta me

presidentin e Egjiptit. Varet vetëm se për çfarë do të flitet, shpjegon Nouripour për Deutsche Wellen. Qeveria duhet të ndërlidhë bashkëpunimin ekonomik me plotësimin e kushteve demokratike, lirinë e mediave dhe lirimin e të burgosurve politikë.

Ngjashëm shprehet edhe eksperti i SPD për Lindjen e Mesme Rolf Mützenich. Ai ka mirëkuptim për udhëtimin e Kauder, thotë për DW. Shefi i deputetëve të Unionit kaherë interesohet për gjendjen e të krishterëve në këtë vend. Por edhe ai mendon se do të kishte qenë më mirë që vizita e Al-Sisit të realizohet pas zgjedhjeve demokratike në Egjipt.

Trazirat në Jemen

Kritikat në llogari të politikës së qeverisë ndaj Lindjes së Mesme kanë të bëjnë edhe me shkallëzimin e gjendjes në Jemen. Nouripour e quan absurde mbështetjen prej qeverisë gjermane të Arabisë Saudite në këtë konflikt. Jemeni është një vend me shumë probleme të ndryshme, që të mund të zgjidhen problemet me një ndërhyrje ushtarake nga jashtë. Gjermania me mbështetjen e Arabisë Saudite po e humbë mundësinë e një ndërmjetësuesi në këtë konflikt, një rol ky të cilin Berlini do të kishte mundur të luajë për shkak të ndihmave të shumta në Sana për vite të tëra. Ministria e Jashtme i ka quajtur legjitime sulmet ajrore të forcave saudite ndaj pozicioneve të milicëve Houthi në Jemen. Por politikani i SPD mendon se edhe vet Arabia Saudite ka influencuar futjen në kaos të Jemenit. Arabi Saudite i sheh milicët shiitë Houthi si agjentë të Iranit, që duhet luftuar. Në Jemen bëhet fjalë për një luftë për influencë mes Riadit dhe Teheranit.

Politika ndaj Irakut

E komplikuar mbetet gjendja në Irak. Nouripour mendon se qeveria gjermane nuk i ka kontribuar sa duhet stabilitetit atje. Ajo ka dërguar armë për Peshmergët, ushtarët kurdë në luftë kundër forcave të Shtetit Islamik. Por tani këto armë po përdoren edhe në luftën kundër sunitëve në Kirkuk. Mesazhi është se ata janë të padashur, që është fatale, mendon ai. Vetëm me integrimin e shiitëve dhe sunitëve në strukturat e pushtetit është e mundur një qetësi afatgjatë dhe stabilizimi i vendit. Mützenich nuk e ka të qartë se si duhet të pozitionohet Gjermani, për të parandaluar terroristët në luftërat qytetare. Ai është skeptik ndaj dërgimit të armëve për Peshmergët dhe luftëtarët kurdë të PKK. Por nuk ka ndonjë përgjigje se si duhet luftuar i ashtuquajturi Shteti Islamik.