PD: Vëllai i deputetit socialist, tender të paligjshëm për Lagunën e Patokut

7 Prill 2015, 08:43, Politikë CNA

Drejtuesi i Departamentit të Sigurisë në Partinë Demokratike, Bashkim Shehu, ka deklaruar se vëllai i deputetit socialist Armando Prengës, ka përfituar një tender në mënyrë të paligjshme për shfrytëzimin e lagunës së Patokut, duke lënë të papunë peshkatarët e zonës. Në një deklaratë për mediat, Shehu tha se tenderi është fituar edhe pse kompania e vëllait të deputetit kishte 2 muaj që ishte krijuar.
Ndërsa ka shtuar se Kryeministri Rama po bën ndarje favoresh të majme me njerëz të inkriminuar, të cilët i ka të përfshirë në administratë.

Deklarata e plote:

Ndërsa dekriminalizimi është kthyer në nevojë jetike dhe në urgjencë kombëtare, Edi Rama, autori i inkriminimit masiv të institucioneve e parlamentit, jo vetëm nuk po reflekton, por po bën të kundërtën, po bën edhe biznes me lidhjet e tij kriminale.

Dhënia e lagunës së Patokut, një prej pasurive kombëtare, vëllait të deputetit Armando Prenga, është padyshim thellimi i inkriminimit.

Me një tender të dyshimtë, në shkelje të të gjithë kritereve teknike, vëllai i deputetit të Edi Ramës, ka arritur të fusë në dorë këtë aset të çmuar edhe pse ka një kompani të ngritur enkas, prej 2 muajsh.

Kemi këtu dokumentat që tregojnë se kompania e vëllait të deputetit Prenga ka dalë fituese, ndonëse është krijuar vetëm dy muaj më parë.

Kështu, Armando Prenga për të cilin ka informacione për aktivitet kriminal në Itali dhe vende të tjera të Europës, me identitet të ndryshuar për shkak të problemeve me drejtësinë, po i forcon lidhjet me Edi Ramën përmes biznesit korruptiv dhe në kurriz dhe dhjetra peshkatarëve që mbanin familjet e tyre deri më sot me këtë aktivitet në Lagunën e Patokut.

Ky është një rast i pastër i gërshetimit të lidhjeve kriminale me korrupsion e biznes qeveritar.

Kjo është skema e inkriminimit në veprim dhe këtë po bën Edi Rama, me ndarje favoresh të majme me të inkiriminuarit që ka futur në administratë, në zyra, në partinë e tij e deri në parlament.

Partia Demokratike paralajmëron Edi Ramën dhe ortakët e tij se nuk do ta njohë këtë kontratë korruptive dhe do ta anullojë atë në momentin më të parë kur të marrrim përgjegjësitë për vendin.