INSTAT: Ekonomia shtohet me 2,4 % në tremujorin e katërt

3 Prill 2015, 10:02, Aktualitet CNA

Ekonomia është shtuar me 2.42% në tremujorin e katërt të vitit me kontributin e lartë të sektorit të ndërtimit bëri të ditur INSTAST. Me këtë rezultat rritja ekonomike vjetore më 2014 arriti në 1.9 për qind nga 2.1 për qind që ishin pritjet e qeverisë për këtë vit.
Kontributin kryesor në këtë rritje e kanë dhënë degët e ekonomisë si Ndërtimi me 1.56 pikë për qind, Shërbimet e tjera me 0.95 pikë për qind, Tregti, Hotele dhe Restorante me 0.54 pikë për qind, industria me 0.24 pikë për qind dhe Transporti me 0.09 pikë për qind.
Degët që kanë kontribuar negativisht janë Bujqesia, Gjuetia dhe Pyjet me -0.67 pikë për qind dhe Posta dhe Komunikacioni me -0.30 pikë për qind.

Degët kryesore të ekonomisë për tremujorin e katërt të vitit 2014 krahasuar me tremujorin e katërt të vitit 2013 shfaqen si më poshtë: Aktiviteti Bujqësor në tremujorin e katërt të vitit 2014 krahasuar me të njëjtin tremujor të një viti më parë pati një rënie prej 2.66%.
Grupi i industrive pati rritje me 1.61% në tremujorin e katërt të vitit 2014 krahasuar me tremujorin e katërt të vitit 2013. Në këtë grup, industria Përpunuese dha ndikimin pozitiv me një rritje prej 3.39%, ndërsa industria Nxjerrëse ra me 0.47%.
Aktiviteti i Ndërtimit në tremujorin e katërt të vitit 2014 pati rritje prej 10.81% krahasuar me tremujorin e katërt të vitit 2013. Grupi i degëve Tregti, Hotele dhe Restorante pati një rritje prej 3.26% në tremujorin e katërt të vitit 2014 krahasuar me të njëjtin tremujor të një viti më parë. Në këtë grup, dega e Tregtisë pati një rritje prej 3.56% ndërsa dega Hotele dhe Restorante pati rritje me 1.13%.
Aktiviteti i Transportit ka shënuar një rritje prej 3.01% në tremujorin e katërt të vitit 2014 krahasuar me të njëjtin tremujor të një viti më parë. Grupi i degëve Posta dhe Komunikacioni u shfaq me një rënie prej 9.48% në tremujorin e katërt të vitit 2014 përkundrejt tremujorit të katërt të vitit 2013.

Grupi Shërbime të tjera në tremujorin e katërt të vitit 2014 pati rritje me 3.21% kundrejt tremujorit të katërt të vitit 2013. Në këtë grup ndikim pozitiv dhanë degët si Aktivitetet Financiare, Aktivitete mbi pasuritë e patundshme, dhënies me qera dhe shërbime për ndërmarrjet, Administrata Publike.

Sa i përket ndryshimeve në krahasim me tremujorin paraardhës, treguesi i Vlerës së Shtuar Bruto vlerësohet me një rritje prej 1.12%. Aktiviteti Bujqësor në tremujorin e katërt të vitit 2014 krahasuar me tremujorin paraardhës u ul me 2.77%.
Me vlerësimin e tremujorit të katërt, iNSTAT jep një vlerësim paraprak për vitin 2014 i cili mbështetur në treguesin e Vlerës së Shtuar Bruto (V.SH.B) tremujore pati rritje prej 1.89% krahasuar me vitin 2013.

monitor.al