E fundit!

09:05 Kosova & Bota

Kim Jong Un: Koreja e Veriut do të pajisë Marinën me armë bërthamore

Lideri i Koresë së Veriut, Kim Jong Un ka deklaruar se for...

Eksportuesit e terrorit

12 Janar 2015, 22:24, Aktualitet CNA

Një prej vrasësve të Parisit qe përgatitur në Jemen. Jemeni është një nga vendet më të varfra arabe dhe ofron terren ushqyes për terrorin.

Sulmet ishin një akt hakmarrjeje për të rivendosur nderin e Pejgamberit. Kështu e shpjegon organizata terroriste “Al-Kaida në Gadishullin Arabik” (Al-Qaida in the Arab Peninslua, AQAP) në një video të publikuar të premten (09.01.2015) terrorin e Parisit. Ajo kërcënon gjithashtu dhe me sulme të reja. Franca, thuhet në video, bën pjesë në forcat kryesore të mungesës së besimit. “Ajo fyen Profetin, nënveftëson fenë dhe lufton besimtarët.”
Të premten (09.01.2015), Cherif Kouachi, një prej atentatorëve të Parisit, i tha stacionit francez BFMTV se ishte ngarkuar nga AQAP për të kryer sulmin. Kjo organizatë ka financuar gjithashtu sulmin.

Si shërbimet sekrete franceze edhe ato amerikane konfirmojnë që Cherif Kouachi është përgaitur në një kamp terrorist në Jemen. Por nëse kontakti, sikurse pretendohet ka vazhduar faktikisht deri në momentin e fundit, tani për tani nuk dihet.

Fakt është, megjithatë, se emri i Stéphane Charbonnier, një nga piktorët e vrarë të gazetës “Charlie Hebdo”, gjendej në një poster të bërë sipas modelit të posterave amerikanë për personat e shpallur në kërkim, të botuar në revistën xhihadiste në internet “Inspire” në mars 2013. “Inspire” me sa duket botohet nga AQAP-i. Ai dhe të tjerët e shpallur “në kërkim” akuzoheshin për: “Krime kundër fesë islame”.

Revista me një grafikë tërheqëse, e cila boton edhe udhëzime se mund të ndërtohen bomba, i takon me sa duket predikuesit radikal Anvar Al-Avlaki. Al-Avlaki, që është qytetar amerikan me origjinë nga Jemeni. Detyra e tij ishte të rekrutonte myslimanë të rinj për Al-Kaidën. Për këtë ai përdorte kryesisht mediat digjitale. Ai kishte një blog të vetin, ishte aktiv në rrjetet sociale dhe vinte videot në internet. Në vitin 2004 Al-Avlaki, që kishte lindur në shtetin amerikan, New Mexico, u shpërngul me familjen e tij në Jemen. Në mars të vitit 2010, ai bëri thirrje për një “luftë të shenjtë” kundër Shteteve të Bashkuara. Në shtator të vitit 2011, ai u vra në gjatë sulmi me avionë pa pilot të SHBA-së.

Terren ushqyes për terrorin

AQAP është krijuar në vitin 2009 prej bashkimit të degëve të Al-Kaidës në Arabinë Saudite dhe Jemen. Grupi që operon në Jemen konsiderohet si tejet agresiv. Ata janë përgjegjës për sulmin me lëndë shpërthyese ndaj destrojerit amerikan USS Cole, që ishte ankoruar në portin e Adenit në tetor të vitit 2000. Tetë vjet më vonë, grupi sulmoi ambasadën amerikane në Sanaa, ku u vranë 16 vetë. AQAP ishte edhe organizatorja e sulmit të dështuar ndaj Northwest Airlines në dhjetor të 2009.

Jemeni është një nga vendet më të varfra arabe. Vendi vuan nga mungesa e madhe e ujit. Rreth 40 për qind e rreth 23 milionë jemenasve konsiderohen si të kequshqyer dhe korrupsioni është i përhapur në të gjithë vendin si epidemi. Shteti është i dobët dhe sidomos pas dorëheqjes së qeverisë së Salihut në shkurt 2012, shteti nuk është në gjendje për të zbatuar autoritetin e tij në të gjithë territorin e vendit. Zonat e brendshme janë shumë të vështira për t’u arritur prandaj AQAP ka aty një strehë të sigurt.

Sulme me efekt të dyshimtë të avionëve pa pilot

Me mbështetjen e SHBA-së, qeveria jemenase po përpiqet ta luftojë Al-Kaidën. Shtetet e Bashkuara përdorin kryesisht avionë pa pilot. Organizata “Bureau of Investigative Journalism” ka konfirmuar për vitet 2002 – 2014 rreth 80 sulme me avionë pa pilot. Prej tyre janë vranë deri në 541 vetë, përfshirë edhe deri në 83 civilë, ndër ta shtatë fëmijë. Gjatë sulmesh të tjera të pakonfirmuara mund të jenë vrarë edhe deri në 900 vetë të tjerë, përfshi edhe deri në 100 civilë.

Sulmet me avionë duket se deri tani nuk i kanë bërë shumë dëm AQAP-së. Kritikuesit kanë madje frikë se ato janë kundërproduktive: vdekja e kaq shumë civilëve mund të çojë lehtë më shumë pasues në krahët e organizatës terroriste. Po ashtu në vend ka edhe shumë jemenitas sunitë që janë në arrati brenda vendit për shkak të revoltës dhe të luftimeve me huthis që janë shiitë. Al Kaida mund të rekrutojë kontigjente edhe nga radhët e refugjatëve. Po ashtu AQAP-i ka lidhje dhe me milicët Al-Shabab në Somali.

Strategji e re

Prej kohësh e ka ndryshuar taktikën e saj edhe Al-Kaida. Ajo u rekomandon pasuesve të vet që në vend të atentateve të mëdha, të vështira për t’u realizuar, të kryejnë sulme të vogla. “Krimet e shteteve perëndimore – ndër to Amerika, Britania e Madhe dhe Franca – do të kenë pasoja të thella brenda vendeve të tyre”, thuhet në botimin e fundit të “Inspire”. “Inspire” i inkurajon lexuesit për sulme në vende perëndimore. Mundësisht në Amerikë, por edhe në Britaninë e Madhe apo Francë. Atentatorët e saj goditën tani në Francë. Për Al-Kaidën, e cila po ballafaqohet kohët e fundit me konkurrencën gjithnjë në rritje nga “Shteti Islamik”, sulmi në Francë është edhe një fitore propagandistike.