E fundit!

11:24 Aktualitet

SPAK merr të pandehur ish-kryebashkiakun socialist

SPAK ka marrë të pandehur ish-kryebashkiakun socialist të ...

Nuk

12 Janar 2015, 17:31, Aktualitet CNA

Nga Edison YPI

Nuk i kuptova kurrë. Nuk i durova kurrë. Nuk i mora kurrë seriozisht. Nuk më ngjallnin asnjë interes, asnjë kuriozitet, vetëm neveri, vetëm krrupë, vetëm pështirosje. Nuk ngjanim aspak. Nuk ishim nga i njëjti univers. Nuk i përkisnim të njëjtës rracë, madje as të njëjtës Botë. Nuk na rrihte e njëjta erë. Nuk na lagte i njëjti shi. Nuk na errte e njëjta natë. Nuk na zbardhte e njëjta ditë. Nuk na ngrohte i njëjti Diell. Nuk na zbehte e njëjta Hënë. Nuk na shkundëte i njëjti tërmet. Nuk na digjte i njëjti vullkan. Nuk u ndjeva rehat në praninë e tyre asnjë çast. Nuk u afruam kurrë. Nuk flisnin, pëshpërisnin. Nuk llafoseshin, brohorisnin. Nuk punonin, rrinin. Nuk hanin, lëpinin. Nuk ecnin, zvarriteshin. Nuk ja shqita sytë kurrë zogjve, aeroplanave, harabelave, dhe të gjithë fluturakëve, si dhe mjeteve notuese, lundruese; anijeve, varkave, sepse qysh fëmijë kam dashur të arratisem. Nuk më kuptonin. Nuk mund të më kuptonin. Nuk ua dhashë kurrë as rastin as kënaqësinë të më kuptonin. Nuk mund të mos veja në Zbor ku një herë për pak sa nuk më futën në burg sepse i thashë një dikujt që kapota e ushtrisë që kisha veshur ishte e vjetër. Nuk u ula kurrë në bankën e parë në shkollë. Nuk kam folur kurrë me mësuesit dhe pedagogët. Nuk lashë libër pa lexuar. Nuk më shpëtoi soc-autor pa e tallur. Nuk fola kurrë në asnjë mbledhje kolektivi. Nuk vajta në asnjë aksion rinie. Nuk vajta kurrë në Opera. Nuk vajta kurrë në teatër. Nuk pashë kurrë asnjë film shqiptar nga fillimi në fund. Nuk kërkova kurrë rritje rroge. Nuk j’u vardisa kurrë kurrkujt për ndonjë privilegj. Nuk kam këmbyer kurrën e kurrës muhabet me asnjë shef, drejtor, apo çfardo epror. Nuk u bëra kurrë problem i ndonjë polici. Nuk kam njohur kurrë ndonjë sigurimist. Nuk kam pasur për asnjë çast dhe asnjë rast të bëj me Sigurimin për të cilin dija vetëm se ekzistonte. Nuk kam njohur asnjë shqiptar të famshëm të asaj kohe përveç dyve; Lasgush Poradecit dhe Ismail Kadaresë. Nuk pashë kurrë një edicion të plotë lajmesh në televizor. Nuk ka dalë dhe nuk ka për të dalë kurrë nga goja ime emri i kurvit. Nuk marr asnjë qindarkë për ato që shkruaj. Nuk i përgjigjem askujt për opinionet që shpreh. Nuk u bleva kurrë, dhe kurrë nuk do blihem. Nuk u shita kurrë, dhe kurrë nuk do shitem. Nuk u zvarrita dhe nuk zvarritem. Nuk këndova. Nuk marrshova. Nuk brohorita. Nuk duartrokita. Nuk u dorzova. Nuk u rrëzova. Nuk u gënjeva. Nuk harrova.