E fundit!

22:44 Politikë

Shërbimet e huaja në lojë?/ Gazetari: Mund të jenë ulur këmbëkryq në protestë, rrezik për sigurinë kombëtare

Gazetari Mentor Kikia ngriti sot pikëpyetje lidhur me pran...

Tirana-Teuta, Dobi: Kjo sfidë ka domethënie të veçantë

17 Tetor 2025, 18:06, Sport CNA

Tirana-Teuta, Dobi: Kjo sfidë ka domethënie të

Teuta kërkon të vazhdojë serinë e fitoreve në kampionat pas një prologu impresionues në Superligë. Kundërshtari i radhës është Tirana, një duel me histori dhe rivalitet të gjatë mes dy prej klubeve më me traditë në vend.

Përtej rëndësisë sportive, kjo ndeshje mbart edhe një ngarkesë të veçantë emocionale për skuadrat, tifozët dhe vetë qytetet që ato përfaqësojnë.

Në prag të ndeshjes, trajneri i Teutës, Enkeleid Dobi, foli për mënyrën si është përgatitur skuadra, objektivat e ekipit dhe ndikimin që ka mbështetja e tifozëve në një ndeshje të këtij niveli.

Mister Dobi, përballja me Tiranën është gjithmonë një test i rëndësishëm. Si e keni përgatitur skuadrën për këtë sfidë?

Jo vetëm me Tiranën, por çdo ndeshje është e rëndësishme për ne. Sigurisht që kjo sfidë ka një domethënie të veçantë, për shkak të historisë mes Teutës dhe Tiranës. Janë dy nga klubet më të vjetra në Shqipëri dhe ky është një rivalitet që edhe unë e kam shijuar vetë në kohën kur luaja. Kjo i jep një rëndësi të madhe përballjes, por për ne çdo ndeshje mbetet po aq e vlefshme.

Skuadra juaj ka treguar stabilitet në fazën mbrojtëse javët e fundit. Do të shohim një Teutë më të kujdesshme apo më sulmuese në këtë takim?

Në çdo ndeshje jemi të kujdesshëm dhe të përkushtuar në të gjitha fazat e lojës. Punojmë çdo ditë për të pasur një Teutë ambicioze, me personalitet, që e shpreh qartë idenë e saj në fushë. Ndeshja me Tiranën, që do të luhet në “Air Albania”, ka emocionet dhe rëndësinë e vet. Ne duam të transmetojmë në fushë punën që bëjmë çdo ditë dhe të tregojmë personalitetin tonë si skuadër.

Sa e rëndësishme është kjo ndeshje për objektivat afatgjatë të Teutës në kampionat?

Çdo ndeshje është e rëndësishme. Që në fillim kemi thënë se do t’i marrim ndeshjet një e nga një. Kjo sfidë është për ne pothuajse si një “finale e vogël”, sepse duam ta fitojmë. Do të hyjmë në fushë me të njëjtin mentalitet dhe të njëjtin objektiv si gjithmonë. Pastaj fusha tregon të vërtetën.

A ndjeni presion përballë një kundërshtari si Tirana?

Presion ka në çdo ndeshje. Pa taktikë nuk fiton dot, por emocionet janë ato që bëjnë diferencën. Duhet t’i kontrollojmë dhe t’i kthejmë emocionet në energji pozitive. Presioni është pjesë e jetës dhe e futbollit. Pas çdo fitoreje, ajo shndërrohet në një kënaqësi të madhe.

Çfarë prisni nga atmosfera në stadium dhe sa ndikon mbështetja e tifozëve në moralin e lojtarëve?

E kemi thënë dhe do ta përsërisim: ky klub, këta lojtarë, të gjithë ne punojmë për këtë qytet dhe për tifozët. Ata janë pjesë e pandarë e kësaj historie, ashtu siç ndodh në çdo cep të botës. Mbështetja e tyre ka domethënie të madhe. Nuk janë vetëm familjet tona në shkallët e stadiumit, por gjithë dashamirësit e sportit, njerëzit që duan këtë klub dhe qytetin. Ata na mbështesin në të mirë e në të keqe, dhe për ta luajmë këto ndeshje.