web counter
LEXO PA REKLAMA!

SHKARKO APP

App Store
Google Play

Po stërviten me Skënderbeun, por ja pse disa lojtarë nuk po firmosin

30 Qershor 2023, 17:39, Sport CNA

Skënderbeu ka ambicie të mëdha në sezonin e ri, që përkon me rikthimin e klubit korçar në Superiore pas një viti mungesë. Drejtuesit janë të angazhuar për të ndërtuar një ekip kompetitiv, duke përmbushur kërkesat e trajnerit Ivan Gvozdenoviç.

Megjithatë, edhe pse po mbushet një javë nga dita kur korçarët kanë nisur përgatitjet për sezonin e ri, ekipi ende nuk është gati. Boshti i skuadrës nuk është bashkuar me pjesën tjetër të grupit, por kjo nuk e pengon trajnerin bardhekuq që të krijojë idenë e parë për lojtarët që ka në dispozicion.

Gjithsesi, ajo që ka më shumë rëndësi në këto momente është angazhimi i zyrtarëve të klubit për t’i dhënë trajnerit një grup të kompletuar lojtarësh. Korçarët do të fillojnë zyrtarisht fazën përgatitore pas datës 5 korrik, në kohën kur ekipi pritet të marrë formën e plotë pas mbërritjes në Korçë të të gjithë lojtarëve në kontratë.

Më pas do të jetë në dorën e trajnerit Gvozdenoviç për të përzgjedhur listën e 25 lojtarëve që do të jenë zyrtarisht pjesë e ekipit për sezonin e ri.

Aktualisht janë afruar 10 lojtarë dhe pikërisht emra si Klevis Shaqe, Markos Ramos, Suhejl Muharem, Marko Alia, Mario Rabiu, Kristian Keqi, Ermir Rashica, Alkeo Bani, Orestis Ademaj dhe Dejvid Janaqi, por jo të gjithë kanë firmosur.

Për një pjesë të tyre do të jenë vendimtare stërvitjet në vazhdim dhe ndonjë miqësore që ekipi mund të zhvillojë, në mënyrë që Gvozdenoviç të shuajë dilemat për disa lojtarë.

 





Lajmet e fundit nga