E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Partizani synon kualifikimin, nisin shqetësimet për trajnerin Gega

14 Korrik 2025, 19:04, Sport CNA

Partizani barazoi 1-1 në ndeshjen e parë të raundit të parë të Ligës së Konferencës ndaj Kalju në Estoni. Një rezultat që, ndonëse nuk ishte fitore, ruan ekuilibrin dhe lë të hapura mundësitë për kualifikim në ndeshjen e kthimit që do të luhet në Tiranë. Përballja në Talin ishte një test i vështirë për skuadrën shqiptare, që përballë një kundërshtari me më shumë eksperiencë në arenën europiane, u përball edhe me vështirësi të brendshme që e ndërlikuan misionin e saj.

Dëmtimi i Kekos në pjesën e parë, i prishi planet e stafit teknik. Sulmuesi 23-vjeçar, që është rritur ndjeshëm në formë pas ardhjes së trajnerit Gega, u detyrua të largohej nga fusha me barelë dhe mes lotësh, duke i lënë vendin Elson Himallarit.

Një tjetër mungesë që rëndoi ishte ajo e Vusal Isgandarli. Sulmuesi nga Azerbajxhani nuk udhëtoi me skuadrën në Estoni për shkak të problemeve me pasaportën, dhe ndonëse nuk ishte i llogaritur për këtë ndeshje, klubi ka shpresë se ai mund të jetë i gatshëm për takimin e kthimit. Me largimin e Kekos dhe mungesën e Isgandarli, Partizani e përballoi sfidën me alternativa të reduktuara në repartin ofensiv, duke u detyruar të ndryshojë strategji gjatë lojës.

Lista e UEFA-s për raundin e parë nuk mund të modifikohet, çka do të thotë se për sfidën e kthimit Partizani do të ketë në dispozicion të njëjtët lojtarë. Kjo situatë rëndon edhe më shumë mbi mesfushën, që u shfaq si një nga repartet më të brishta në Talin.

Në mungesë të përvojës, përgjegjësia i është besuar një grupi lojtarësh të rinj në moshë, si Sembene, Kote, Vata, Malaj dhe Shanaj. Asnjëri prej tyre nuk e kalon moshën 23 vjeç, ndërsa më i riu është vetëm 16 vjeç.

Trajneri Skënder Gega u përball me nevojën për të improvizuar, duke përshtatur skemën në bazë të lojtarëve në dispozicion. Ishte një ndeshje që kërkoi shumë sakrificë, si në aspektin fizik ashtu edhe taktik. Pavarësisht vështirësive, Partizani arriti të shmangë humbjen në transfertë, duke e mbyllur takimin me një rezultat që mban të gjalla shpresat për kalim në turin tjetër.

Për ndeshjen e kthimit në Tiranë, fokusi kryesor i stafit do të jetë rikuperimi i plotë i lojtarëve dhe menaxhimi i minutave në mënyrë efikase. Me grupin e njëjtë lojtarësh dhe në mungesë të përforcimeve të mundshme për shkak të kufizimeve në listë, Partizani do të kërkojë të përfitojë nga faktori fushë dhe mbështetja e tifozëve për të kaluar më tej në Europë.