Nis mes spektaklit raundi i dytë i Ligës së Kombeve/ Triumfojnë Spanjë e Portugali, Modric bën heroin te Kroacia

9 Shtator 2024, 09:27, Sport CNA

Nis mes spektaklit raundi i dytë i Ligës së Kombeve/

Foto nga ndeshja Zvicër-Spanjë. Burimi: Flascore

Raundi i dytë i Ligës së Kombeve nisi mes spektaklit, me të mëdhatë që bënë detyrën.

Spanja luajti për më shumë se 70 minuta me dhjetë lojtarë, megjithatë ia doli të triumfojë me poker ndaj Zvicrës.

Takimi i luajtur në “Stade de Geneve” u mbyll më fitoren 1-4 të “furisë së kuqe”, e cila e nisi serinë e golave me Joselu në minutën e 4-t, teksa vetëm nëntë minuta më pas Fabian Ruiz dyfishoi avantazhin e ekipit të tij.

Ishte minuta e 20-të kur Le Normand u ndëshkua me karton të kuq dhe la ekipin e tij në inferioritet numerik, gjë e cila u shfrytëzua më së miri nga Zvicra, që rihapi sfidën me Amdouni në minutën e 41-të.

Megjithatë spanjollët vazhduan me sulmet dhe në minutën e 77-të Ruiz shënoi golin e dytë personal dhe të tretin për ekipin e tij, teksa Torres vulosi rezultatin me golin e shënuar në minutën e 80-të.

1-4 dhe Zvicra renditet në vend të fundit të grupit A4 me zero pikë, teksa Spanja pozicionohet në vend të dytë me katër pikë.

Nga ana tjetër Portugalia përmbys Skocinë dhe ruan ecurinë pozitive në Ligën e Kombeve.

Takimi i luajtur në “Estadio da Luz” u mbyll me rezultatin 2-1, ndërsa ishin skocezët ata që gjetën rrugën drejt rrjetës të parët, me McTominay që zhbllokoi sfidën në minutën e 7-të.

U desh minuta e 54-t kur Bruno Fernandes i asistuar nga Leao të barazonte për Portugalinë, duke e festuar në mënyrën më të mirë të mundshme ditëlindjen e 30-të.

Ndërsa Cristiano Ronaldo shënoi golin e fitores për ekipin e tij në minutën e 88-të.

2-1 dhe Portugalia kryeson grupin A1 me gjashtë pikë, teksa Skocia renditet në vend të katërt me zero pikë.

Në ndeshjen tjetër Luka Modric vazhdon të bëjë heroin te Kroacia, duke i dhënë fitoren 1-0 ndaj Polonisë.

39-vjeçari shënoi golin e vetëm të kësaj përballjeje në minutën e 52-të dhe i dha triumfin ekipit të Kroacisë, ndërsa nga ana tjetër Lewandowski nuk ia doli të bëjë të njëjtën gjë për Poloninë.

Pas këtij takimi Kroacia renditet në vend të dytë me tri pikë, teksa Polonia në vend të tretë po me tri pikë./ CNA