E fundit!

10:21 Aktualitet

PD bojkoton sërish seancën

Partia Demokratike ka bojkotuar edhe seancën e sotme në Pa...

“Mesi është më i miri i historisë, e meriton këtë Kupë Bote”/ Modriç fajëson arbitrin: Ky tipi, ndër më të këqijtë në qarkullim

15 Dhjetor 2022, 19:33, Sport CNA

Luka Modriç, një zotëri i futbollit. Ndonëse nervozizmi pas ndeshjes mund të kuptohej, ai një ditë më pas ka dashur që të urojë Lionel Mesin dhe Argjentinën, por ndërkohë nuk pranon që të tregojë të njëjtën dashamirësi për arbitrin italian, Daniele Orsato, kundër të cilit ka vetëm ndjesi negative.

Në konferencën për shtyp, ai nuk ka lajmëruar asgjë lidhur me të ardhmen, ndonëse këtë pritet që ta bëjë të shtunën, pas ndeshjes së vlefshme për vendin e 3/4 në Katar. Deri atëherë veterani fenomenal i Realit të Madridit i përulet ish-rivalit të tij te Barcelona, madje duke lëshuar edhe një fjali që nuk do t’i ketë pëlqyer aspak ish-shokut Kristiano Ronaldo.

“Në këtë pikë, shpresoj që skuadra që na mposhti ne të fitojë këtë Botëror. Argjentina e meritoi ndaj nesh dhe mbi të gjitha e meritoi Mesi, i cili për mua është futbollisti më i mirë i historisë. Leo po bën një Kupë Bote fantastike, duke treguar cilësitë dhe madhështinë e tij në çdo ndeshje, – bën hyrjen e tij 37- vjeçari, i cili në momentin e zëvendësimit, u duartrokit edhe nga tifozët e Argjentinës.

“Po, ishte një moment shumë i bukur dhe vetëm mund t’i falënderoj për këtë vlerësim ndaj meje. Edhe unë dua t’i përgëzoj ata, pasi realisht në fushë u ndjente një atmosferë fantastike, më së shumti si rrjedhojë e mbështetjes që tifozët e Argjentinës, më të shumtë në numër, i bënë kombëtares së tyre. Ishte një përshëndetje e bukur, prandaj dua me gjithë zemër që t’i uroj më të mirat.Mesi, vetëm dy vite më i vogël sesa unë? Leo ka shumë vite që është në majë dhe vazhdon që të qëndrojë aty. Për këtë arsye i uroj të ketë sukses në këtë Botëror të fundit për karrierën e tij. Argjentina e meritoi fitoren ndaj nesh, pavarësisht se unë kam shumë për të kontestuar ndaj atij arbitri”. Dhe pikërisht tema “Orsato” bën që Modriç, që rrallë herë është parë të flasë i nervozuar të marrë një pamje agresive.

“Nuk më ka pëlqyer kurrë në karrierën time që të flas për arbitra, por ky tipi këtu (nuk i përmend as emrin) është një ndër më të këqijtë në qarkullim. Nuk kujtoj një ndeshje të lumtur ndaj tij. Për mua nuk ishte penallti dhe ai episod ishte ai që na vrau ndeshjen tonë. Ishte një rast që ndryshoi gjithçka, por e përsëris, vetëm ai e pa atë penallti. Gjithsesi, tani gjithçka ka mbaruar, është e kotë të flasim. E vetmja gjë që na mbetet është të rikuperojmë energjitë dhe të fitojmë sfidën për vendin e tretë”, përfundoi kapiteni i Kroacisë.