Leao “tërbon” tifozët/ Allegri e mbron, por rrezikon vendin në formacion

6 Tetor 2025, 15:36, Sport CNA

Leao “tërbon” tifozët/ Allegri e mbron, por rrezikon

Sezoni i Milan-it nisi me sinjale pozitive edhe falë Rafael Leao-s, autor i golit të parë zyrtar të skuadrës në këtë edicion. Më 17 gusht, në fitoren 2-0 ndaj Barit për Kupën e Italisë, sulmuesi portugez shënoi dhe u pa si një nga pikat më të forta të formacionit të Massimilliano Allegri-t. Megjithatë, pak minuta pas golit, një dëmtim në pulpë e detyroi të largohej nga fusha dhe ta ndalonte ecurinë e tij për më shumë se një muaj. Rikthimi i tij ndodhi më 28 shtator kundër Napoli-t, një moment që pritej me interes nga trajneri, shokët e skuadrës dhe tifozët. Por kthimi nuk solli efektin e dëshiruar.

Në ndeshjen e fundit kundër Juventus-it, Leao u aktivizua në minutën e 63-të në vend të Santiago Gimenez. Ai pati dy mundësi të arta për të shënuar, por i humbi të dyja. Fillimisht, pas një krosimi të Pulisic nga e majta, portugezi nga vetëm pak metra larg portës nuk arriti të gjuante saktë. Më vonë, në minutat shtesë, pas një pasimi në thellësi nga Luka Modric, Leao gaboi sërish, duke lehtësuar pritjen e portierit të Juventus-it, Di Gregorio. Dy momente që e përshkruajnë më së miri fazën që po kalon sulmuesi kuqezi.

Konkurrenca në sulm është e ashpër. Me Pulisic të padiskutueshëm në formacion, Allegri ka tri alternativa për repartin ofensiv: Gimenez, Nkunku dhe Leao. Ndërsa edhe sulmuesi meksikan po has vështirësi në shënim, ai tregon një përfshirje më të mirë në sistemin e lojës dhe në aspektin taktik. Pikërisht ky është elementi që mungon te Leao sipas trajnerit italian. Allegri e ka mbështetur vazhdimisht publikisht portugezin, duke theksuar se “ka arritur moshën për të bërë një sezon të madh” dhe se “është momenti që ai ta ndihmojë skuadrën po aq sa skuadra e ndihmon atë”. Por deri tani, pritshmëritë nuk janë përmbushur.

Në rrjetet sociale, tifozët e Milan-it nuk kanë kursyer kritikat. Ata e akuzojnë Leao-n për mungesë përqendrimi dhe e lidhin këtë me aktivitetet e tij jashtë fushës, si transmetimet e shpeshta “live” në platformën Twitch. Në komentet e tyre, shumë tifozë e konsiderojnë si lojtar me potencial të madh, por që nuk po e shfrytëzon plotësisht. Pakënaqësia duket se po rritet, ndërsa Milan-i ka nevojë urgjente për efikasitet në sulm.

Në pankinë, reagimet e Massimiliano Allegri-t ndaj rasteve të humbura nga Leao ishin të dukshme. Trajneri kërkon më shumë përqendrim, disiplinë dhe vendosmëri. Ai e di se potenciali i portugezit mund të bëjë diferencën, por vetëm nëse lojtari arrin të ndryshojë qasjen dhe të rikthejë besimin në lojën e tij. Në të kundërt, me konkurrencën që rritet dhe rezultatet që kërkohen menjëherë, rreziku për të humbur vendin në formacion është real.