E fundit!

09:42 Aktualitet

Masat për sezonin veror/ Lamallari: Siguri më e lartë në destinacionet turistike

U prezantuan sot masat e marra nga Policia e Shtetit për g...

Kryeqyteti, nën ethet e derbit: Partizani-Tirana, direkt e interesuar Vllaznia që pret të përfitojë

5 Mars 2023, 13:18, Sport CNA

Katër skuadra të përfshira në betejën e titullit. Të paktën 5 në atë të zonës europiane. E po aq, në mos më shumë, të kapura nga ethet e mbijetesës. Më i distancuar vetëm Kastrioti, por edhe ai jo i pashpresë. Kjo është situata në vigjilje të javës së 24-t të Superiores. Java në të cilën luhet derbi kryeqytetas, por mund të përfitojë Vllaznia. Java që mund të krijojë ndasi edhe mes zonës europiane dhe asaj të mbijetesës.

Do të ndodhë pikërisht kështu kur të dielën në orën 13:00 do të zbresë në fushë Bylisi. Mallakastriotët janë të parafundit me 26 pikë e përballë tyre rreshtohet Erzeni, i pesti me 32. Në Ballsh Shensoi ka shansin t'u japë mundësinë të tijve të dalin nga zona e rrezikut. Në anën tjetër, Kapllani e di mirë se duhet të fitojë në transfertë, sukses që i mungon që nga takimi në Kukës në 22 janar. Egnatia me 34 pikë nuk mund të thotë se nuk e ka mendjen te titulli, kur llogaritë ia lejojnë. Një fitore kundër Kastriotit të vendit të fundit e kombinuar me humbjen e kryesuesve në derbi do t'i afronte rrogozhinasit 3 pikë nga vendi i parë. Natyrisht Tetova, pas katër rezultatesh pozitive, duhet të fitojë edhe ndaj të besuarve të Çelës. Pa harruar se ata tronditën Shkodrën me suksesin 0-1 vetëm një javë më parë.

05/03/23
Bylis 13 : 00 Erzeni
Egnatia 13 : 00 Kastrioti

Të hënën do të kompletohet java me tri sfidat e tjera. Laçi do presë në shtëpi Kukësin, me dy skuadrat në krizë. Kurbinasit me një fitore do të ktheheshin të mendonin Europën. Ndërsa Kukësi do të linte zonën "playout" për kundërshtarin e kësaj ndeshjeje. Skuadra e momentit, Teuta, do të provojë të ndjekë ëndërrën Europë kur përballë të ketë Vllazninë. Pasi mposhtën kryesuesit e Tiranës, durrsakët kanë vetëm një humbje në 11 takimet e fundit. Të besuarit e Martinit në rast suksesi do të mbërrinin -1 nga shkodranët e në varësi të derbit kryeqytetas mund të hapen skenarë të rinj. Ndërqytetasen pret edhe Vllaznia që duhet të fitojë për të mësuar ç'do të ndodhë mes Partizanit e Tiranës. Derbi mund të bëjë që kuqeblutë ta shohin veten dy pikë larg vendit të parë.

06/03/23
Laçi 13 : 00 Kukësi
Teuta 16 : 00 Vllaznia
Partizani 19 : 00 Tirana

Përplasja e tretë sezonale mes të kuqve e bardhebluve ka gati ekuilibër të plotë. Një fitore për secilën e tri pikë distancë. Një derbi për kreun me dy skuadra favorite që vijnë nga humbja e me një situatë delikate në pankinë. Për të kuqtë Colella është nën presion, ndërsa organika e shkurtër e Tiranës limiton Shehin në zgjedhje. Luhet shumë në "Arenën Kombëtare" në orën 19:00, me të gjitha ndeshjet që do të nisin me një minutë heshtje, në nder të viktimave të aksidentit tragjik të trenave në Greqi.