E fundit!

13:38 Politikë

Kush janë iniciatorët e regjistrimit të protestës/ Nga njerëzit e Lapajt, te njerëzit e Kokëdhimës

Prej 11 ditësh janë zhvilluar protesta kundër qeverisë dhe...

Hero ndaj Interit, historia e veçantë e Adzic

14 Shtator 2025, 19:05, Sport CNA

Në futbollin europian ka gjithmonë histori të reja për t’u ndjekur, dhe një nga më të spikaturat aktualisht lidhet me një emër që po fiton shpejt hapësirë në skenën e madhe: Vasilije Adzic. I lindur më 12 maj të vitit 2006 në Mal të Zi, ai u rrit në një periudhë kur futbolli italian po përballej me skandalin e njohur si “Calciopoli”, ndërsa më vonë Italia do të shpallej kampione bote.

Ndërkohë, në vendin e tij, Adzic do të hidhte hapat e parë te klubi lokal Polet Stars, për të kaluar më pas te Buduçnost, ku shfaqi talentin e tij të hershëm. Në gusht të vitit 2022 ai debutoi në ekipin e parë dhe shënoi menjëherë, një sinjal i qartë për aftësitë e tij të spikatura.

Fillimisht i aktivizuar si mesfushor, Adzic tregoi një aftësi të veçantë për të qenë vendimtar pranë portës, duke kombinuar vizionin në lojë me sensin e golit. Ky profil e bëri atë shpejt objektiv të skautëve të Juventusit, të cilët e afruan në Itali verën e vitit 2024, për një shumë prej afërsisht 4 milionë eurosh, duke përfshirë edhe bonuset.

Transferimi i tij ishte menduar për skuadrën e të rinjve, me të cilën ai zhvilloi dhjetë ndeshje dhe realizoi katër gola. Megjithatë, trajneri Thiago Motta e pa të gatshëm për nivele më të larta dhe i dha shpesh mundësinë të stërvitej e të aktivizohej me ekipin e parë. Debutimi në Serinë A erdhi në tetor, në përballjen ndaj Lacios.

Vlerësimet pozitive nuk kanë munguar. Mota e ka cilësuar si lojtar të përshtatur për skuadrën e madhe, ndërsa trajneri aktual Igor Tudor ka theksuar se klubi po punon me të prej gjashtë muajsh, duke vlerësuar teknikën, shpejtësinë, fuqinë fizike dhe përkushtimin e tij.

Në Mal të Zi krahasimet shkojnë deri te emra si Milinkoviç-Saviç apo Kevin De Bruyne, edhe pse vetë Adzic ka deklaruar se idhujt e tij janë Lionel Mesi dhe Zinedin Zidan.

Në verë pati zëra për një kalim të mundshëm te Palermo, por lojtari vendosi të qëndrojë për të luftuar për një vend në skuadrën e parë të Juventusit. Vendim që tashmë duket i drejtë, sidomos pas golit vendimtar në Derbin e Italisë ndaj Interit, ku Adzic shënoi golin e katërt në fitoren 4-3 të bardhezinjve, duke lënë gjurmë në një nga ndeshjet më të rëndësishme të kampionatit italian.

Karriera e tij ndërkombëtare ka nisur gjithashtu me hap të mbarë. Ai ka debutuar me përfaqësuesen e Malit të Zi dhe ka gjetur golin në një miqësore, duke u konsideruar tashmë si një nga figurat më premtuese të futbollit malazez pas Stefan Jovetiç. Drejtori sportiv i Buduçnost, Andrija Delibasiç, e ka quajtur atë “gjënë më të bukur që i ka ndodhur futbollit malazez në 15 vitet e fundit”.

Në këtë fazë të sezonit, Juventus e sheh si një element që mund të sjellë freski dhe cilësi. Me problemet fizike të Kosensaos dhe formën e luhatshme të Kopmainers, trajneri Tudor po mendon seriozisht t’i japë Adzic një vend titullari në sfidën e ardhshme të Champions League kundër Borussia Dortmund.