E fundit!

15:02 Opinione Gëzim Seferi

Për “dylberët” e opozitës

Si fillim, dua t’ju them se ky shkrim nuk u drejtohet patr...

Andorrë-Shqipëri, si pritet të rreshtohen kuqezinjtë

13 Nëntor 2025, 09:58, Sport CNA

Kombëtarja shqiptare është gati për një nga ndeshjet më të rëndësishme të kualifikueseve të Kupës së Botës.

Mbrëmjen e kësaj të enjte, kuqezinjtë do të përballen me Andorrën, në një takim që mund të përcaktojë fatin e pjesëmarrjes së Shqipërisë në fazën “play-off”.

Skuadra e drejtuar nga trajneri Silvinjo kërkon me çdo kusht fitoren, në mënyrë që të ruajë vendin e dytë në grup dhe të qëndrojë në garë për një arritje historike në Botëror.

Kuqezinjtë zhvilluan seancën e fundit stërvitore në Andorrë, ku u testuan disa prej skemave taktike që pritet të përdoren në ndeshjen e sotme.

Trajneri brazilian, së bashku me stafin e tij teknik, ka tashmë një ide të qartë për formacionin që do të zbresë në fushë, ndërsa nuk priten ndryshime të mëdha në krahasim me ndeshjet e fundit.

Andorrë-Shqipëri, si pritet të rreshtohen kuqezinjtë

Në portë do të jetë Thomas Strakosha, ndërsa katërshja e mbrojtjes përbëhet nga Elseid Hysaj në të djathtë, Mario Mitaj në të majtë, dhe dyshja Berat Gjimshiti me Arlind Ajetin në qendër.

Në mesfushë pritet të luajnë Kristjan Asllani dhe Julian Shehu, ndërsa vendi i tretë në këtë repart do të vendoset mes Qazim Laçit dhe Medon Berishës, që janë në balotazh për një fanellë titullari.

Në sulm, Silvinjo pritet të vendosë Manajn në qendër, me Armando Brojën në të djathtë, ndërsa për krahun e majtë, gara mbetet e hapur mes Myrto Uzunit dhe Arbër Hoxhës.

Skuadra është përgatitur në kushte optimale dhe atmosfera në grup shihet pozitive, me lojtarët të motivuar për të arritur rezultatin e duhur.

Për takimin e sotëm, UEFA ka konfirmuar se ndeshja do të gjykohet nga një treshe rumune arbitrash.

Kryesor do të jetë Fesniç, i ndihmuar nga asistentët Avram dhe Serei.

Rezultati i kësaj përballjeje është thelbësor për ecurinë e Shqipërisë në grup, pasi një fitore ndaj Andorrës, e kombinuar me një humbje të Serbisë ndaj Anglisë, mund t’i sigurojë kuqezinjve matematikisht vendin e dytë dhe pjesëmarrjen në fazën “play-off” të Botërorit.

Kombëtarja kërkon ta mbyllë çështjen e kualifikimit që në këtë ndeshje, për të shmangur presionin e sfidës së fundit ndaj Anglisë në “Air Albania”.