E fundit!

13:45 Aktualitet

Tensionet në protestën para Kuvendit/ Shoqërohen disa protestues, mes tyre Dritan Goxhaj

Protesta para Kuvendit është shoqëruar me tensione dhe për...

Analiza/ Milani bind me të mëdhatë, kalendari favorizon kuqezinjtë

30 Nëntor 2025, 14:04, Sport CNA

Analiza/ Milani bind me të mëdhatë, kalendari favorizon

Milani arriti një tjetër fitore të rëndësishme në Serinë A duke mposhtur Lazion minimalisht, rezultat që i mundësoi skuadrës së drejtuar nga Masimilliano Allegri të zgjasë serinë pozitive në kampionat në 12 ndeshje radhazi pa humbje.

Ky sukses erdhi në vijim të formës së qëndrueshme në përballjet direkte, ku Milani e ka konfirmuar veten si një prej ekipeve më efikase ndaj rivalëve të zonës së lartë. Që prej fillimit të sezonit, skuadra ka luajtur kundër 6 prej 8 ekipeve kryesore, duke siguruar 16 pikë nga 18 të mundshme. Fitoret ndaj Bolonjës, Napolit, Romës, Interit dhe Lazios, si edhe barazimi kundër Juventusit, e kanë konsoliduar pozicionin e skuadrës në renditje.

Një element i përbashkët i këtyre ndeshjeve ka qenë qasja pragmatike dhe rezultatet e ngushta. Shumica e fitoreve kanë ardhur minimalisht, falë një strukture të qëndrueshme të lojës dhe menaxhimit të kujdesshëm të avantazhit. Edhe ndaj Lazios, Milani pati momente vështirësie, veçanërisht në pjesën e parë, ku Maignan u dallua me disa pritje të rëndësishme.

Megjithatë, pavarësisht këtyre episodeve, rreziqet e shkaktuara përgjatë ndeshjes mbetën të kufizuara. Pas golit të avantazhit, skuadra uli ritmin e lojës, menaxhoi posedimin dhe shmangi situatat e rrezikshme, ndërsa fundi i ndeshjes u shoqërua me polemika për një penallti të kërkuar nga Lazio.

Nga krahu tjetër, skuadra po përballet me kufizime të dukshme në repartin ofensiv, veçanërisht kur mungon Pulisic. Efikasiteti në zonën e fundit të fushës mbetet një aspekt ku Milani kërkon rritje, por organizimi taktik i Allegrit ka bërë që mungesa e zgjidhjeve individuale të kompensohet nga funksionimi i grupit. Ky mekanizëm loje ka vënë në vlerë mbrojtësit dhe ka krijuar mundësi që një numër më i madh lojtarësh të kontribuojnë në fazën sulmuese.

Në vazhdim të sezonit, rëndësia e golave nga lojtarë që kanë pasur pak kontribut deri më tani, si Nkunku, Gimenez apo Rabiot, do të rritet ndjeshëm me kalimin e javëve. Megjithatë, situata aktuale i jep Milanit qetësi, duke marrë në konsideratë edhe faktin se kalendari paraqitet më i favorshëm.

Në javët në vijim, skuadra do të ndeshej me Torinon, Sassuolon, Veronën, Cagliari, Genoa dhe Fiorentinën, përpara sfidës kundër Comos në fund të këtij cikli.