Kryeqyteti në “çarkun” e betonit/ Pallate të reja pa hapësira për fëmijët dhe pa parkime

18 Maj 2026, 09:28, Sociale CNA

Tirana po ndryshon fytyrë çdo ditë, por jo domosdoshmërisht për mirë për banorët e saj. Ndërsa lejet e ndërtimit miratohen me shpejtësi dhe kantiere të reja hapen në çdo cep të qytetit, një krizë e heshtur po prek përditshmërinë e familjeve kryeqytetase: zhdukja totale e hapësirave publike dhe jetike.

Në shumë lagje të Tiranës, ajo që dikur ishte një fushë e vogël lojërash, një lulishte apo thjesht një hapësirë mes pallateve, sot është kthyer në gropë ndërtimi për kullën ose pallatin e radhës. Ndërtuesit marrin leje, ngrenë kate të tëra, por "harrojnë" të kthejnë diçka mbrapsht për komunitetin. Premtimet për parqe dhe kënde lojërash në çdo bllok banimi shpesh mbeten vetëm në makete 3D.

Në realitet, fëmijët detyrohen të luajnë në rrugica të ngushta, mes makinave të parkuara ose mbi trotuarë të dëmtuar, duke rrezikuar kështu edhe jetën. Mungesa e hapësirave të gjelbra po ndikon drejtpërdrejt në shëndetin dhe socializimin e tyre.

Një tjetër problem me të cilin përballen qytetarët janë vendet e parkimit. Edhe pse ligji parashikon që çdo pallat i ri duhet të ketë kate nëntokësore për parkim, realiteti tregon se ato ose janë të pamjaftueshme, ose shiten me çmime stratosferike që banorët nuk i përballojnë dot. Si pasojë, rrugët dytësore janë bllokuar plotësisht, duke vështirësuar edhe kalimin e ambulancave apo zjarrfikëseve. Betonizimi agresiv po krijon ‘ishuj nxehtësie’. Pa pemë dhe pa hapësira të hapura mes pallateve, ajri bëhet më i mbytshëm dhe ndotja akustike e mjedisore arrin nivele alarmante.

Një tjetër problem mbetet cilësia e jetesës për moshat e treta. Pa dritë dielli dhe pa një stol ku mund të ulen e të bisedojnë, të moshuarit mbyllen brenda katër mureve, të izoluar nga pjesa tjetër e qytetit.

Ekspertët e urbanistikës ngrenë pikëpyetje të mëdha mbi mënyrën se si jepen lejet e ndërtimit. Sipas tyre, interesi i përfitimit financiar afatshkurtër të ndërtuesve po triumfon mbi interesin publik. Edhe pse planet rregulluese flasin për "Tiranën e Gjelbër", mjafton një xhiro nëpër lagje për të kuptuar se betoni ka fituar betejën me gjelbërimin.

Nëse nuk ndërhyhet me urgjencë për të vendosur kushte strikte, ku asnjë pallat të mos ndërtohet pa garantuar më parë hapësirën e gjelbër, këndin e lojërave dhe parkimin e nevojshëm, Tirana rrezikon të kthehet në një qytet të pajetueshëm, ku njerëzit thjesht "strehohen", por nuk jetojnë dot./CNA