Analiza për shkollat në Shkodër/ Rritet nota mesatare e nxënësve krahasuar me vitin 2024

20 Janar 2026, 15:29, Sociale CNA

Analiza për shkollat në Shkodër/ Rritet nota mesatare e

Zyra Vendore Arsimore në Shkodër zhvilloi analizën e saj për vitin 2025. Drejtorja e ZVA-së, Brisela Kadia, deklaroi në këtë analizë se është rritur nota mesatare krahasuar me vitin 2024, ndërsa tha se shkollat private kanë rezultate më të larta se ato publike. Po nga analiza, rezulton se shkollat e qytetit dominojnë krahasuar me fshatrat.

“Në vitin 2025 kemi pasur 156 institucione arsimore, ku bëjnë pjesë parashkollorë dhe shkollat prej të cilave kemi 13,010 nxënësish në institucionet publike dhe 4,981 nxënës në ato jo publike me një total prej 17,991 nxënësish. Objektiv kryesor ka qenë rritja e notës mesatare në provimet e maturës shtetërore. Në 2024 kishim një mesatare prej 7.17 dhe në 2025 shkoi 7.347. Arritjet në arsimin jopublik janë më të larta krahasuar me shkollat publike. Po ashtu edhe shkollat e qytetit kanë rezultate më të larta se ato të njësive administrative”,-tha Kadia.

Një tjetër shifër që kërkon një analizë të thellë është se vetëm 72% e maturantëve i janë drejtuar universitetit, prej të cilëve jo më shumë se 41% kanë zgjedhur Universitetin e Shkodrës dhe pjesa tjetër janë shpërndarë në auditoret e Tiranës, privatit dhe universiteteve jashtë vendit në 8%.

“Nga lëndët me zgjedhje, më të preferuara janë lëndët e ekonomisë me 41.55% e nxënësve, qytetari dhe psikologji 22.09%, biologji 19.97%, hoteleri-turizëm 6.23% dhe fizikë 1.77% e nxënësve. Në të gjitha provimet e lëndëve me zgjedhje kalueshmëria është 100%. Ndërkohë 72% e maturantëve u janë drejtuar universiteteve dhe 28% kanë zgjedhur të jenë në tregun e punës. Nga maturantët që vijuan studimet e larta, 41% zgjodhën Universitetin e Shkodrës 'Luigj Gurakuqi', në Universitetet e Tiranës vijuan 12% e maturantëve, në privat 11% e maturantëve, jashtë vendit 8% e maturantëve”,-u shpreh Kadia.

Analiza për shkollat në Shkodër/ Rritet nota mesatare e

Gjatë vitit 2025, Shkodra mori 15 medalje ari ku 10 prej tyre i meritoi shkolla “28 Nëntori”.

“Në vitin 2025, ZVA Shkodër ka arritur një rezultat shumë pozitiv sa u përket medaljeve të arta. Kemi marrë 15 medalje të arta prej të cilave 10 i ka shkolla '28 Nëntori’, që vazhdon të jetë gjimnazi që mban numrin më të lartë të medaljeve të arta, por edhe nga viti në vit e ka rritur këtë numër. Tri medalje të arta ka një shkollë private, gjimnazi ‘Oso Kuka’, një medalje të artë dhe një tjetër e ka një shkollë jopublike që bëjnë 15 në total”,-tha drejtuesja e ZVA Shkodër.

Analiza për shkollat në Shkodër/ Rritet nota mesatare e

Një shqetësim janë klasat kolektive, ku ZVA Shkodër numëron 77 të tilla nga 81 që rezultonin në 2024-ën.

“Kemi pasur një objektiv për të ulur numrin e klasave kolektive dhe nga 81 që kanë qenë në 2025 shkuan në 77 klasa kolektive. Këtu është një sfidë sepse është e vështirë t’u thuash banorëve që fëmijët do të ikin nga kjo zonë në një zonë tjetër për të mësuar, por pavarësisht kësaj ia kemi dalë që ta ulim disi numrin dhe do të vijojmë të përpiqemi”,-tha Kadia.

Gjatë analizës u theksua se shkollat kanë psikologët dhe punonjësit socialë, bashkë me mësuesit, për të minimizuar rastet e bullizmit dhe diskriminimit, si dhe konfliktet mes nxënësve, tema që po marrin gjithnjë e më shumë vëmendje për shkak të problemeve të shfaqura./CNA