E fundit!

11:39 Aktualitet

Rama ka ndërhyrë për Ballukun?/ Braho-opozitës: Paraqitini provat në SPAK

Deputetja Elda Hoti në Komisionin për Nismat Qytetare ka d...

Vota e emigrantëve/ KQZ propozim qeverisë: 600 mijë aplikantë të pavlefshëm, shtyni afatin e dokumentave!

20 Janar 2025, 16:38, Politikë CNA

Vota e emigrantëve/ KQZ propozim qeverisë: 600 mijë

Emigrantët shqiptarë që jetojnë jashtë kufijve të Shqipërisë do të kenë mundësinë të votojnë për herë të parë në zgjedhjet parlamentare të 11 majit. Procesimi për regjistrimin e tyre ka nisur, por KQZ ka hasur në një numër të lartë deri në 600 mijë prej tyre që kanë probleme me afatin e skadencës së mjeteve të identifikimit.

Në këtë formë, KQZ i bën një propozim qeverisë për të shtyrë afatin e skadencës në mënyrë që të regjistrohen sa më shumë emigrantë dhe të kenë kështu mundësinë e votës në 11 maj.

Shkresa e plotë:

Lënda: Mbi shtyrjen e afatit të vlefshmërisë së dokumenteve të identifikimit

Drejtuar: Këshillit të Ministrave

Për Dijeni: Partisë Socialiste të Shqipërisë

                     Partisë Demokratike

                     Partisë së Lirisë

                     Partisë Socialdemokrate

                     Partisë Republikane

                     Partisë Agrare Ambientaliste

                     Partisë për Drejtësi Integritet dhe Unitet

                     Partisë Bashkimi për të Drejtat e Njeriut

                    Lëvizjes për Zhvillim Kombëtar

Të nderuar,

Prej datës 11 janar 2025 ka filluar procesi i regjistrimit të votuesve nga jashtë, nëpërmjet Platformës Elektronike të Regjistrimit të Komisionit Qendror të Zgjedhjeve (PER). Ky proces do të përfundojë në datën 4 mars 2025.

Në takimet konsultative që KQZ ka organizuar përgjatë kësaj periudhe me përfaqësues të partive politike, si dhe me organizatat e shoqërisë civile me fushë veprimi brenda dhe jashtë vendit, është sjellë në vëmendje në mënyrë të përsëritur çështja lidhur me vlefshmërinë e dokumenteve të identifikimit.

Kjo problematikë është konstatuar tek një numër i konsiderueshëm i zgjedhësve brenda dhe jashtë vendit dhe kërkon zgjidhje të menjëhershme në kuadër të mbarëvajtjes së procesit të votimit për zgjedhjet për Kuvend të datës 11 maj 2025.

Nga informacionet që KQZ ka marrë pranë Ministrisë së Brendshme dhe kompanisë së prodhimit të dokumenteve biometrike, aktualisht, rezultojnë të jenë 600 248 zgjedhës të pajisur me dokument identifikimi të pavlefshëm.

Nga të dhënat e siguruara nga PER, rezulton të jenë regjistruar rreth 900 (nëntëqind) zgjedhës nga jashtë të cilët nuk zotërojnë një dokument identifikimit të vlefshëm.

Për sa më lart, bazuar në rëndësinë që ka votimi nga jashtë si dhe pamundësisë objektive të zgjedhësve jashtë vendit për t’u pajisur brenda afateve ligjore me dokument identifikimi të vlefshëm në kuadër të ushtrimit të të drejtës së votës, KQZ propozon marrjen në konsideratë të shtyrjes së afatit të vlefshmërisë së dokumenteve të identifikimit për zgjedhësit me vendqendrim jashtë territorit të Republikës së Shqipërisë, deri në 30 maj 2025.

Duke ju falënderuar për bashkëpunimin,

Me konsideratë, Ilirjan Celibashi

Komisioner Shtetëror i Zgjedhjeve /CNA