Ngrihet Komision Etike/ Rama: Kush është bërë deputet për të sistemuar në punë shteti familjarët, jo më pjesë e grupit

11 Shtator 2025, 12:42, Politikë CNA

Ngrihet Komision Etike/ Rama: Kush është bërë deputet

Kryeministri Edi Rama ka njoftuar në Asamblenë e sotme se do të ngrihet në çdo bashki një Komision Etike i përbërë nga deputetë dhe përfaqësues të PS-së. Rama tha se ky komision do të trajtojë fenomenin e punësimeve të familjarëve të deputetëve në administratën shtetërore. Kryeministri deklaroi se familjarët e politikanëve nuk mund të kërkojnë avantazhe në vendimmarrje apo në aksesin e detyrave publike. Çdokush tha Rama, duhet të vlerësohet nga merita dhe jo nga mbiemri.

Kryeministri u ndal edhe te deputetët që bëjnë emërime familjarësh, për të cilët tha se vendosin në sistemin e punës dallkaukë që ndikojnë negativisht. Rama u shpreh se të zbusësh nepotizmin është si t'i hysh një rrjete, më e shpifur se ajo e merimangave, por do ta luftojnë për ata që u kanë besuar votën.

Kryesocialisti deklaroi se Komisioni i Etikës do të përcaktojë kufijtë dhe çfarë lejohet dhe jo. Sa u përket deputetëve që bëjnë emërime familjare, Rama tha se nuk do të jenë më pjesë e grupit parlamentar.

“Deputetët mos ta harrojnë se të përfaqësosh Vlorën është një privilegj, që sado të punosh nuk mund ta meritosh dot deri në fund. Të ngremë një komision etike me deputetë dhe përfaqësues të PS-së në çdo bashki, të trajtojë një fenomen të vjetër, të egër, që duhet sulmuar agresivisht nga qeveria dhe grupi parlamentar, nepotizmi. Lidhjet e gjakut në pozicione drejtuese. Familjarët e një pjese këtu kanë meritën që na mbështesin pa kushte duke marrë dhe baltë, krejt të pamerituar. Kur vjen puna te vendimmarrja dhe aksesi te detyrat publike, familjarët nuk mund të kërkojnë avantazhe. Çdo njeri të vlerësohet sipas meritës, jo sipas mbiemrit, jo sipas interesit politik. Deputetët që bëjnë qoka në mënyrë të papërgjegjshme dhe nuk duan t’ia dinë se çfarë pasojash ka sistemimi i dallkaukëve në sistemin e punën. Ato sistemime janë pasoja te gjyshërit dhe gjyshet që çohen të parët për të votuar Partinë Socialiste. Të zbusësh nepotizmin është si t'i hysh një rrjete më të shpifur se ajo e merimangës. Por do t'i hyjmë për ata që na e dhanë votën pa na njohur, pa pasur asnjë lidhje gjaku me ne, por duke shpresuar se do t'i trajtojmë fëmijët e tyre në mënyrë të barabartë me tanët. Kush jemi ne që i privojmë ata nga kjo kërkesë krejt legjitime në këmbim të besimit dhe mbështetjes që na kanë dhënë. Kush është bërë deputet për të sistemuar në punë shteti familjarët nuk do të jetë më i mirëpritur në grupin parlamentar, nëse do të shfaqet si nepotik.

Komisioni i Etikës do të përcaktojë kufijtë, çfarë është e mundur dhe çfarë jo. Nëse ndonjë thotë se fmailjarët janë të aftë, deputeti të lërë mandatin dhe t’u japë mundësi familjarëve të tregojnë veten në punën e shtetit”, tha Rama.