Mbyllet protesta/ Berisha për Ramën: Nëse guxon të sulmojë selinë e PD, selive të tij nuk do t'u gjejnë gjurmë

20 Shkurt 2026, 21:46, Politikë CNA

Mbyllet protesta/ Berisha për Ramën: Nëse guxon të

Kryedemokrati Berisha me një prononcim për mediet nga selia blu ka mbyllur protestën e sotme të opozitës si dhe ka deklaruar se do të njoftohet në ditët në vijim protesta e ardhshme.

Protestë për të cilën Berisha deklaroi se do të jetë kombëtare dhe më e madhja e zhvilluar ndonjëherë.

Në fjalën e tij, Berisha u shpreh se sulmet ndaj opozitës janë përshkallëzuar, pasi u hodhën bomba helmuese në selinë e PD-së.

Kryedemokrati i bëri thirrje Ramës se nëse guxon të sulmojë selinë blu, nuk do t’u gjejë gjurmët selive të tij.

“Në qoftë se shtatorja e satanit ndodhej në sheshin “Skënderbej”, busti i gjallë i pasardhësit të tij nuk ndodhej as në Shqipëri. Kjo nuk na pengoi të dëshmonim vendosmërinë më të madhe, për t’u përballur dhëmbë për dhëmbë me falangat e krimit që përdorën mjete të paligjshme kundër kryengritësve paqësorë. Plani i tyre ogurzi për të krijuar gjakderdhje u shpalos duke qëlluar në ballë kandidaten për deputete, Senada Mehmeti.

U qëlluan pas koke me bombola gazi. U përdorën bomba helmuese dhe ato shurdhuese vetëm e vetëm për të akuzuar opozitën.

Sot përshkallëzimi i Edi Ramës kundër opozitës ka qenë i paprecedentë. Sot kriminelë me uniformë kanë hedhur bomba tymuese dhe bombola gazi në territorin e PD. Sot Edi Rama ka ndërmarrë një akt të pashembullt, ka sulmuar selinë e PD si një hakmarrje ndaj kryengritësve paqësorë. I jap fjalën e nderit se nëse guxon të sulmojë këtë seli, selive të tij gjurmë nuk do t’u gjejë. Është mundim i madh për ne të përmbajmë qytetarët dhe sulmet e tyre ndaj selive të krimit. Ata janë të gatshëm t’i bëjnë të paqena. Urrejtjen atërore që ke ndaj pluralizmit mos e shpreh duke gjuajtur bombula tymi në selinë e PD. Ne jemi kryengritës paqësorë, por nuk tolerojmë sulmin ndaj selisë. Hiq dorë nga sulmi në selinë e PD. Jemi të gatshëm të të përgjigjemi siç e meriton.

Do t’ia njoftojmë shumë shpejt kryengritjen e radhës. Do të jetë kombëtare, më e fuqishmja që ka njohur Shqipëria”, tha Berisha./CNA