web counter
LEXO PA REKLAMA!

SHKARKO APP

App Store
Google Play

Kur Ilir Metës i qajnë hallin pa pasur hall

30 Prill 2026, 11:28, Politikë REDAKSIONALE

Disa foto të ish-presidentit Ilir Meta në kutinë prej xhami në GJKKO bënë namin në media, në rrjete, ku pati qëndrime të ashpra, mëshirë, apelime, qëndrime të pakuptimta, ku në fakt Ilir Meta nuk kërkonte asgjë.

Pasi dolën fotot, shumë individë thanë se e kanë keqtrajtuar, e kanë dhunuar atje në burg.

Në fakt, Ilir Meta nuk ka folur kurrë për keqtrajtim apo për dhunim, pretendimin e vetëm e ka pasur për ndonjë telefonatë. Ka kërkuar vetë të qëndrojë në burgun “313”, është në masa të forta sigurie.

Më pas, kur folën analistët dhe opinionistët tanë “mendjendritur” që treguan se ishte dhunuar, keqtrajtuar, i ishin shkelur të drejtat, Ilir Meta doli dhe tha se ishte si kokrra e mollës, bënte ushtrime fizike dhe tani po kërkonte dhe një bibliotekë për burgun “313” dhe këtë e njoftoi pas takimit me Klevis Balliun.

Pra, Ilir Meta nuk ka pasur ndonjë qëndrim se është dhunuar, se e kanë keqtrajtuar, se i janë shkelur të drejtat, se doli vetë dhe i përgënjeshtroi tërë këta mendjendriturit opinionistë, duke thënë se vazhdonte të bënte ushtrime fizike për të qëndruar në formë.

Patjetër që ishte më i zverdhur, është normale, nuk ka ikur me pushime në kamp. Qëndron prej një viti e gjysmë në burg, ndaj tij pritet të zhvillohet gjyqi, proceset kanë ecur, vazhdon të ankimojë çështjet, të akuzojë qeverinë e Edi Ramës, nga shëndeti mendor ishte në rregull, foli për presidentin e 2 marsit, foli për McGonigal, përgjegjësit tha se nuk do të ishin të vetëm, ndaj ata që i qanë hallin Ilir Metës, për çfarë ia qanë?

Se Ilir Meta nuk dukej të kishte ndonjë problem me shëndetin apo dhunimin e të drejtave, përkundrazi përse këta opinionistët dhe analistët tanë të pushtetit e mbajnë Ilir Metën kryesisht si hall të madh, se obobo është zverdhur atje brenda?

Mos kanë ndonjë hall tjetër, të ndonjë të arrestuari apo të burgosuri tjetër, që nuk ka as burrërinë dhe forcën e Ilir Metës që t’i qëndrojë dhe të shkojë atje në gjykatë, por përpëlitet me skema, skenarë dhe intriga që të dalë nga burgu?

Ilir Meta nuk duket të ketë ndonjë problem me shëndetin se kështu të paktën deklaroi dhe vetë, por këta që ia qajnë hallin se ishte pak i zverdhur janë problem i madh se, në fakt, nuk ia qajnë Ilir Metës, por ia qajnë tjetërkujt, pagatorëve të tyre, njëri prej të cilëve ndodhet në burgun e Durrësit./ CNA





Lajmet e fundit nga