web counter
LEXO PA REKLAMA!

SHKARKO APP

App Store
Google Play

E fundit!

x

E pazakontë/ Belind Këlliçi procedohet për protestën e 10 shkurtit, teksa ndodhet në SHBA

11 Shkurt 2026, 12:15, Politikë CNA

E pazakontë/ Belind Këlliçi procedohet për protestën

Deputeti i Partisë Demokratike, Belind Këlliçi, ka reaguar në lidhje me njoftimin e policisë dhe raportimet në medie se ai ishte proceduar në gjendje të lirë pas protestës së djeshme.

Procedim për veprat kundërshtim policie dhe shtyrje e të miturve në krim.

Por ky procedim ka diçka të pazakontë, deputeti Belind Këlliçi është proceduar pa qenë fare pjesë e protestës.

Ashtu siç e njofton dhe ai vetë me anë të reagimit, Këlliçi ndodhet në Shtetet e Bashkuara të Amerikës, ku dhe ka zhvilluar takim me prokurorin shqiptaro-amerikan, Robert Lulgjuraj.

Këlliçi në reagimin e bërë shkruan se ky procedim i pazakontë i tij duke mos qenë pjesë e protestës, dëshmon targetin politik të Ilir Prodës.

Më tej, Këlliçi thotë se dosjen ndaj tij ta ruajnë për protestën e 20 shkurtit, në të cilën do të jetë në vijën e parë.

 

Deklarata e Këlliçit

 

Ndërkohë që takoja mikun tim Robert Lulgjuraj në Qendrën Kulturore “Nënë Tereza” në Miçigan, prokurorin shqiptaro-amerikan që garon për në Kongresin e SHBA nën rradhët e Partisë Republikane, mësoj se Policia e Shtetit në Tiranë, e drejtuar nga ushtari i krimit të organizuar Ilir Proda, më paska proceduar dhe marrë nën hetim për organizimin e protestës dhe udhëheqjen e përplasjes me efektivët e rendit!!!

Kjo dëshmon targetin politik që e ka gati narkodrejtuesi dhe shërbëtori i bandave, Proda, i cili pavarësisht se ndodhem jashtë vendit dhe një oqean larg, më bën letrat për prokurori.

I them Prodës dhe shefit të tij, kreut të narkoshtetit Edi Rama, ta ruajë dosjen për protestën e 20 shkurtit, pasi do jem aty, në vijën e parë, bashkë me demokratët dhe qytetarët që nuk pranojnë korrupsionin e krimin si normë, si rregull, si rend.

Krenar për secilin demokrat e qytetar që dje u përball me dhunën e paprecedentë policore dhe i bëj thirrje çdo shqiptari, që më datë 20 shkurt, të dalë në shesh, jo për partitë politike, por për atdheun, për flamurin tonë kombëtar.

PS: Përtej banalitetit që prodhon shteti i drejtuar nga Edi Rama, gjej rastin të ftoj çdo shqiptar në shtetin e Miçiganit dhe kudo tjetër, të mbështesë me çdo mundësi Robert Lulgjurajn, në këtë shans historik, që një shqiptar të ulet në Kongresin Amerikan./CNA

 





Lajmet e fundit nga