Vera Politkovskaja: Putini nuk do të rrëzohet/ Sistemi i tij i pushtetit është ende i fortë

27 Shkurt 2023, 08:42, Kosova & Bota CNA

Vera Politkovskaja: Putini nuk do të rrëzohet/ Sistemi i tij i

Është dita e fjalimit para kombit, dhe ndërsa në TV Vladimir Putin bën ende thirrje për vazhdimin e luftës kundër Ukrainës, të cilën vazhdon ta quajë një “operacion special”, Vera Politkovskaja, e ftuar në redaksinë e gazetës italiane “La Repubblica”, kujton mësimin që i dha dikur nëna e saj: "Pavarësisht masave shtypëse, duhet t’i quash gjithmonë gjërat me emrin që kanë vërtet”.

Ana Politkovskaja ishte gazetarja disidente ruse më e rëndësishme, e njohur në mbarë botën për investigimet e saj mbi luftën në Çeçeni, censurën dhe korrupsionin në Rusinë e Putinit. Ajo u vra para derës së shtëpisë më 7 tetor 2006. Veprës dhe jetës së saj i kushtohet biografia që e bija Vera ka shkruar së bashku me gazetaren italiane Sara Giudice me titull “Një nënë”.

Putin vazhdon të përsërisë se Perëndimi dëshiron ta “shkatërrojë” Rusinë. Nga buron ky fiksim i tij?

Është një ide që vjen nga koha e Bashkimi Sovjetik, kur çdo gjë negative lidhej me Perëndimin. Mbetet një ide shumë e përhapur në Rusinë e sotme, e cila e sheh Perëndimin si një qytetërim dekadent, që ka vlera të ndryshme, të cilat janë në konflikt me ato ruse. Dhe Putin po luan pikërisht me këtë kartë.

Në funksion të çfarë qëllimi?

Unë besoj se e bën për të pushtuar sa më shumë territore të reja.

Për të shlyer lëndimin që pësuan sipas tij rusët nga shembja e Bashkimit Sovjetik?

Unë mendoj se kjo luftë po ndodh për shkak të projektit të tij perandorak, i cili kërkon aneksimin e vazhdueshëm të territoreve nga një vend që është më i madhi në botë për nga sipërfaqja. Kohët e fundit bëri bujë lajmi se në vitin 2030, Bjellorusia ka shumë të ngjarë të bëhet pjesë e Federatës Ruse si një nga republikat e saj, duke e humbur kësisoj pavarësinë e saj.

Pjesa më e madhe e asaj që shkroi dikur nëna juaj për për putinizmin, u shpërfill prej kohësh nga Perëndimi, që ishte i bindur se një Rusi demokratike do të integrohet së shpejti në Europë. Ishte një gabim apo ka ndryshuar Putini?

Ai nuk ka ndryshuar, dhe nëna ime e ka parashikuar shumë vite më parë - edhe pse nuk u dëgjua - atë që po ndodh tani.

Çfarë mund të presim pas largimit të Putinit?

Ky nuk është një problem aktual. Putin e ndryshoi Kushtetutën për të mbetur president deri në vitin 2036. Sistemi aktual është shumë i fortë, nuk është si një shtëpi prej letre. Ai qëndron mbi kolona të forta. Po ju jap një shembull: në shkollat ruse, një pjesë e programit mësimor i kushtohet patriotizmit, që merr trajtat e të menduarit dhe shikimit të së kaluarës që burojnë nga epoka e Bashkimit Sovjetik. Që në moshë të re ne rusët jemi mësuar ta shohim botën me sytë e dikujt tjetër. Përpara se të ndryshojë rrënjësisht e gjithë kjo do të duhet shumë kohë, dhe është një tranzicion që do të kushtojë jetë njerëzore.

Si ato të ushtarëve rusë të dërguar në front në Ukrainë...

Vladimir Putini po i përdor ata si mish për top. Nëna ime thoshte se për të njerëzit janë si pluhuri nën çizmet e tij.

Në Europë, shumë njerëz po pyesin pse rusët nuk protestojnë masivisht kundër luftës....

Arsyeja kryesore është se ata kanë frikë. Në Europë, nëse dikush merr pjesë në një demonstratë në mbrëmje ai shkon në shtëpi dhe fle në shtratin e tij. Në Rusi, në rastin më të mirë kalon një natë në një qeli burgu. Por mundet edhe të mos dalë më kurrë prej saj, pasi mund të rrihet dhe të vdesë nga goditjet. Një pjesë e popullsisë është dakord me këtë luftë, dhe një pjesë që është kundër nuk del në rrugë të protestojë sepse ka frikë nga ajo që do të vijë pas Putinit.

Përkthyer nga CNA.al