LEXO PA REKLAMA!

SHKARKO APP

App Store
Google Play

Tensionet në veri të Kosovës/ Franca dhe Gjermania kërkojnë zgjedhje të reja

1 Qershor 2023, 19:29, Kosova & Bota CNA

Tensionet në veri të Kosovës/ Franca dhe Gjermania

Franca dhe Gjermania i kanë kërkuar udhëheqësve të Kosovës dhe Serbisë që të organizojnë zgjedhje të reja në veri të Kosovës sa më parë që është e mundur.

Lajmin e ka konfirmuar presidenti francez, Emmanuel Macron, në një konferencë në Kishinau.

Ai tha se javët në vijim do të ketë “vendime të qarta” për situatën në veri të Kosovës.

Kjo deklaratë vjen pasi Presidenti Macron dhe kancelari gjerman, Olaf Scholz u takuan me presidenten e Kosovës Vjosa Osmani dhe presidentin serb, Aleksandër Vuçiç, në kuadër të takimit të Komunitetit Politik Evropian në kryeqytetin e Moldavisë.

Osmani konfirmoi se Macron dhe Scholz kërkuan që Kosova të gjejë mënyra për të mbajtur zgjedhje të reja në veri dhe që serbët të marrin pjesë në to.

Ajo deklaroi se “Kosova është gati për të mbajtur zgjedhje të reja në veri nëse zhvillohen përmes procesit ligjor”.

Nga ana tjetër, presidenti serb, Aleksandër Vuçiç u shpreh se nevojitet një zgjidhje e qëndrueshme kompromisi.

“Ne duhet të bindim njerëzit në Ballkan se kompromisi nuk është një gjë e keqe. Nuk është e lehtë, të gjithë janë të radikalizuar dhe askush nuk dëshiron të dëgjojë ide normale”, tha Vuçiç.

Ndërkohë, kujtojmë se në veri të Kosovës ka pasur tensione, pasi serbët nuk lejuan kryetarët e rinj të hyjnë në zyra për marrë detyrën./ CNA.al

Lajmet e fundit nga