Rusia sulmon territorin ukrainas në kufi me Poloninë/ Ngrihen avionët luftarakë polakë

19 Nëntor 2025, 08:04, Kosova & Bota CNA

Rusia sulmon territorin ukrainas në kufi me Poloninë/ Ngrihen

Varshava urdhëroi ngritjen e avionëve luftarakë polakë dhe të aleatëve, si dhe të avionëve AWACS në orët e para të mëngjesit, mes sulmeve ruse me raketa dhe dronë në sektorë të Ukrainës perëndimore, pranë kufirit me Poloninë. Lajmin e ka njoftuar komanda e operacioneve të shtabit të përgjithshëm të Polonisë.

"Çifte avionësh luftarakë të reagimit të shpejtë dhe një avion paralajmërues u ngritën me nxitim dhe sistemet e mbrojtjes ajrore tokësore dhe të mbikëqyrjes së hapësirës ajrore u vunë në gatishmëri maksimale", shpjegoi komanda nëpërmjet X.

Pothuajse e gjithë Ukraina ishte në gatishmëri për shkak të një paralajmërimi nga forcat ajrore në lidhje me sulmet ruse me raketa dhe mjete ajrore pa pilot.

Polonia njoftoi dje se do të rriste nivelin e kërcënimit në disa linja hekurudhore dhe do të përdorte ushtrinë për të mbrojtur infrastrukturën kritike.

Deklarata erdhi pas incidenteve të sabotimit me origjinë ruse, siç ishte shpërthimi në linjën hekurudhore Varshavë-Lublin, e cila lidh kryeqytetin polak me kufirin ukrainas.

Klima shqetësuese në Poloni pasqyrohet në deklaratën e Shefit të Shtabit të Përgjithshëm të Forcave të Armatosura, Gjeneral Wislaw Kukula, ku tha se Rusia ka filluar përgatitjet për luftë dhe se vendi i tij ka hyrë në një fazë para luftës.

“Kreu i Shërbimit të Sigurisë së Brendshme dhe Ministri i Brendshëm më kanë kërkuar të prezantoj nivelin e tretë të kërcënimit, Charlie, për shkak të kërcënimeve terroriste. Ky nivel do të zbatohet për disa linja hekurudhore, ndërsa pjesa tjetër e vendit do të mbetet në nivelin e dytë të alarmit”, tha kryeministri polak, Donald Tusk dje në parlament.

Tusk u tha deputetëve se janë identifikuar dy të dyshuar për sabotimin e fundit në hekurudhën polake, duke shtuar se ata janë ukrainas me bashkëpunim të gjatë me shërbimet e inteligjencës ruse që kanë ikur në Bjellorusi.

Kremlini akuzoi dje Poloninë se i është dorëzuar rusofobisë, pasi Varshava fajësoi për shpërthimin në një linjë hekurudhore për në Ukrainë dy të dyshuar të lidhur me inteligjencën ruse. /CNA