"Nuk marr pjesë në shfaqjen teatrale të pushtetit në ikje"/ Abdixhiku bojkoton seancën: Nesër nisim përgatitjet për zgjedhje

18 Nëntor 2025, 21:30, Kosova & Bota CNA

"Nuk marr pjesë në shfaqjen teatrale të pushtetit në

Kreu i Lidhjes Demokratike të Kosovës, Lumir Abdixhiku përmes një postimi në rrjetet sociale ka reaguar ashpër për zhvillimet politike ku kryeministri në detyrë Albin Kurti propozoi Glauk Konjufcën si kryeministër dhe më pas presidentja Vjosa Osmani e mandatoi atë për formimin e qeverisë së re.
Abdixhiku thotë se zvarritja në krijimin e shumicës dhe formimin e institucioneve ka zgjatur tetë muaj, ndërsa edhe 15 ditë të tjera janë humbur me një “mandatar kukull” që, sipas tij, nuk ka bërë asnjë përpjekje minimale për qeverisje. Ai i konsideron këto zhvillime si populiste dhe të rrezikshme dhe deklaron se distancohet dhe nuk do të marrë pjesë.

"Popullistë të rrezikshëm.

Të investuar në lojëra, intriga e kalkulime politike.

Zvarritën tetë muaj krijim e shumicës e formimin e institucioneve. Na i humbën edhe 15 ditë të tjera me mandatar kukull që s’bënte asnjë përpjekje për minimalisht qeverisje. Nesër, në ditën e fundit, orën e fundit, afatin e fundit, paskan thirrur dy seanca për urgjencën që e shkaktojnë vet me vonesë.

Pa asnjë konsultim.

Pa asnjë komunikim.

Pa asnjë diskutim.

LDK e refuzon dhe shpërfillë këtë qasje politike. LDK e lufton me gjithë qenien e vet këtë logjikë imponimi. Me krenari, e themi se refuzimi i popullistëve është akti më i lartë patriotik sot.

Prandaj LDK nuk bëhet pjesë e shfaqejeve parlamentare të një pushteti në ikje. Nesër nuk marrim pjesë fare në seancën e imponimit teatral të orës 11:00-të. Mblidhuni vet; i bëni muhabet vetes. Luftën me mullinjtë e erës e bëni mirë.

Nesër, nga ora 14:00, votojmë me bindje e krenari kundër pakicës që nuk mund të sillet si shumicë më në këtë shtet.

Nesër nisim pregatitjet për zgjedhjet e reja nacionale dhe ftesën e madhe për përbashkim të secilit që është ngopur me një politikë si kjo, që mendon të shpëtojë shtetin e Republikën nga ata që e shohin atë vetëm si instrument e si lojë karrigesh.

Le t’i fitojmë"!,deklaron Abdixhiku./CNA