E fundit!

15:04 Aktualitet

Merret vendimi/ Gjykata cakton masat e sigurisë për protestuesit

Gjykata Penale e Tiranës ka dhënë vendimin për protestuesi...

Policia e Kosovës sekuestron armë dhe municion pas bastisjeve në veri

16 Prill 2026, 13:55, Kosova & Bota CNA

Policia e Kosovës sekuestron armë dhe municion pas bastisjeve në

Më 16 prill, Policia e Kosovës ka realizuar gjashtë bastisje në veri të vendit, në zona të banuara me shumicë serbe, ku janë sekuestruar armë të llojeve të ndryshme, municion dhe pajisje ushtarake.

Sipas njoftimit zyrtar, bastisjet janë kryer pas informacioneve të marra nga qytetarët në fshatrat Banovë dhe Prevllak të Zubin Potokut.

Në rastin e parë, në një shtëpi të pabanuar janë gjetur katër pushkë të ndryshme, tri radiolidhje, një kamerë, 223 fishekë, uniforma ushtarake dhe pajisje për pastrimin e armëve.

Në një tjetër kontroll, në një shtëpi të banuar, policia ka gjetur një pushkë pa leje dhe tre fishekë. Një person i identifikuar si M.R. (1972) është shoqëruar në polici, është intervistuar dhe më pas është liruar me urdhër të prokurorit, ndërsa ndaj tij po hetohet për veprën penale “armëmbajtje pa leje”.

Në një bastisje tjetër në një shtëpi të pabanuar janë sekuestruar një armë AK-47, tre karikatorë, 88 fishekë dhe një granatë dore e tipit M75. Njësitë për trajtimin e mjeteve eksplozive kanë tërhequr granatën në mënyrë të kontrolluar.

Po ashtu, në kontrolle të tjera janë gjetur armë të tipit AK-47 me municion përkatës, një pushkë M48, një pushkë gjuetie, si dhe pjesë armësh, bajoneta dhe uniforma ushtarake në një hambar.

Prokuroria e Shtetit ka udhëzuar inicimin e rasteve për veprën penale “mbajtje në pronësi, kontroll ose posedim të paautorizuar të armëve”.

Ministri i Punëve të Brendshme, Xhelal Sveçla, ka deklaruar se provat e sekuestruara tregojnë përpjekje për të rrezikuar sigurinë dhe stabilitetin në vend, duke theksuar se çdo aktivitet i tillë do të trajtohet pa kompromis.

Autoritetet në Kosovë kanë raportuar edhe më herët sekuestrime të armëve në veri, veçanërisht pas sulmit të armatosur në Banjskë të Zveçanit në shtator të vitit 2023.

Kosova fajëson Serbinë për atë sulm, ndërsa Beogradi mohon përfshirjen. Për sulmin, përgjegjësinë e ka marrë Millan Radoiçiq, për të cilin autoritetet kosovare kanë ngritur aktakuzë dhe kërkojnë ekstradimin e tij nga Serbia./ CNA