web counter
LEXO PA REKLAMA!

SHKARKO APP

App Store
Google Play

E fundit!

x

Ngërçi politik në vend/ Qytetarët e Bullgarisë i drejtohen sot kutive të votimit

19 Prill 2026, 09:07, Kosova & Bota CNA

Ngërçi politik në vend/ Qytetarët e Bullgarisë i

Qytetarët e Bullgarisë do t’i drejtohen ditën e sotme kutive të votimit me shpresën se do t’i jepet fund ngërçit politik që ka përfshirë prej kohësh vendin.

Votimi i parakohshëm vjen pas dorëheqjes së një qeverie të udhëhequr nga konservatorët mes protestave mbarëkombëtare kundër korrupsionit dhjetorin e kaluar.

Bullgaria, anëtari më i varfër i BE-së, është përfshirë nga një krizë politike që nga viti 2021, kur qeveria konservatore e Boyko Borissov u rrëzua, gjithashtu mes tubimeve kundër korrupsionit.

Cilët janë garuesit në zgjedhjet e Bullgarisë?

Një grupim i sapoformuar i qendrës së majtë nën drejtimin e ish-Presidentit Rumen Radev, Bullgaria Progresive, shihet si një nga favoritët për të fituar zgjedhjet e së dielës, me sondazhet e opinionit që sugjerojnë se mund të marrë 35% mbështetje.

Radev, një ish-gjeneral i forcave ajrore i cili ishte president i Bullgarisë për nëntë vjet përpara se të jepte dorëheqjen në janar për të marrë pjesë në zgjedhje, është zotuar të luftojë atë që ai e quan "model qeverisjeje oligarkike" në vend.

Ai gjithashtu ka mbështetur idenë që Bullgaria të ripërtërijë lidhjet me Rusinë, ndërkohë që ka qenë kritik ndaj dërgimit të ndihmës ushtarake në Ukrainë, ndërsa ajo lufton pushtimin e vazhdueshëm nga trupat e Moskës.

Megjithatë, ai e ka denoncuar zyrtarisht pushtimin e Rusisë dhe ka thënë se nuk do ta përdorë veton e vendit të tij për të bllokuar ndihmën e BE-së për Kievin nëse zgjidhet.

Radev kundërshton gjithashtu politikën e BE-së për energjinë e gjelbër, të cilën ai e konsideron naive "në një botë pa rregulla".

Sondazhet e opinionit tregojnë se partia pro-evropiane GERB e Borisovit, e cila udhëhoqi qeverinë e fundit, ka të ngjarë të dalë e dyta, me rreth 20%, përpara partisë liberale PP-DB.

Borissov, i cili ka shërbyer tre mandate si kryeministër, ka theksuar suksesin e partisë së tij GERB, duke thënë se ajo kishte “përmbushur ëndrrat e viteve 1990”, ndër të tjera duke e bërë Bullgarinë  të bashkohet me eurozonën këtë vit.

Pritet pjesëmarrje e lartë

Qendrat e votimit u hapën në orën 7 të mëngjesit sipas orës lokale (04:00 GMT) dhe do të mbyllen në orën 8 të mbrëmjes sipas orës lokale (17:00 GMT), me një pjesëmarrje të lartë që pritet në vendin ballkanik prej rreth 6.5 milionësh pas vetëm 39% pjesëmarrjeje në zgjedhjet e vitit 2024. Rezultatet paraprake priten të hënën.

 Bullgaria është një vend anëtar i Bashkimit Evropian dhe NATO-s. Ajo iu bashkua eurozonës më 1 janar, menjëherë pasi hyri në zonën e udhëtimit pa kufij Shengen. /DW





Lajmet e fundit nga