Merz: Ushtria ukrainase do të pajiset me sisteme zjarri me rreze të gjatë veprimi

20 Nëntor 2025, 09:12, Kosova & Bota CNA

Merz: Ushtria ukrainase do të pajiset me sisteme zjarri me rreze të

Kancelari Friedrich Merz ka deklaruar se Gjermania është e gatshme t'i ofrojë ndihmë të mëtejshme ushtarake Ukrainës. Deklarata e tij vjen pas sulmeve më të fundit të Rusisë, të cilat Merz i përshkroi si një luftë terrori kundër popullsisë civile.

Ai bëri gjithashtu me dije se ushtria ukrainase do të pajiset me sisteme zjarri me rreze të gjatë veprimi, ndërsa nuk dha detaje të mëtejshme.

“Ne duam të bëjmë gjithçka që mundemi për të përmirësuar mbrojtjen ajrore të Ukrainës. Në muajt e fundit, kemi diskutuar intensivisht me qeverinë ukrainase për mundësinë e zbatimit edhe të planeve të zjarrit me rreze të gjatë veprimi, siç i quajmë teknikisht. Ushtria ukrainase do të pajiset me sisteme të tilla. Kemi rënë dakord që nuk do të flasim më publikisht për detaje, sepse jemi të mendimit se është e nevojshme edhe njëfarë paqartësie ndaj palës ruse në lidhje me shkallën e mbështetjes ushtarake që ofrojmë”, tha Merz gjatë një konference për shtyp që dha më herët këtë mbrëmje me kryeministrin suedez Ulf Kristersson.

Merz shtoi se Gjermania do të ndajë tre miliardë euro shtesë vitin e ardhshëm për mbështetje ushtarake për Ukrainën, me kushtin e qartë që vendi të mbetet një partner i besueshëm. Duke iu referuar skandalit të fundit të korrupsionit brenda qeverisë ukrainase, Kancelari theksoi se nevojitet veprim i vërtetë dhe i pamëshirshëm kundër korrupsionit, i cili sipas tij është i nevojshëm për Ukrainën dhe për perspektivën e saj europiane.

Friedrich Merz përsëriti gjithashtu thirrjen për partnerët europianë që të arrijnë një marrëveshje mbi përdorimin e aseteve të ngrira ruse para fundit të vitit.

"Kjo është arma më e fortë e presionit për të sjellë Moskën në tryezën e negociatave dhe për t'i dhënë fund përfundimisht kësaj lufte të tmerrshme", tha Kancelari. /CNA