Ulen tensionet/ Trump njofton takim me kryebashkiakun e Nju Jorkut në Shtëpinë e Bardhë

20 Nëntor 2025, 08:44, Kosova & Bota CNA

Ulen tensionet/ Trump njofton takim me kryebashkiakun e Nju Jorkut në

Presidenti Donald Trump ka njoftuar një ditë më parë se planifikon të presë kryetarin e zgjedhur të bashkisë së Nju Jorkut, Zohran Mamdani, të premten në Zyrën Ovale. Ky do të ishte takimi i parë ballë për ballë për të dy politikanët që kur Mamdani u zgjodh në fillim të këtij muaji.

“Kryebashkiaku komunist i qytetit të Nju Jorkut, Zohran 'Kwame' Mamdani, ka kërkuar një takim. Ne kemi rënë dakord që ky takim të zhvillohet në Zyrën Ovale të premten, më 21 nëntor. Detajet e mëtejshme do të vijojnë më poshtë!", shkroi Trump në platformën e tij Truth Social.

Dora Pekec, një zëdhënëse e kryebashkiakut të zgjedhur, konfirmoi gjithashtu takimin përmes një deklarate.

“Siç është zakon për një administratë të re kryebashkiake, kryebashkiaku i zgjedhur planifikon të takohet me Presidentin në Uashington për të diskutuar sigurinë publike, sigurinë ekonomike dhe agjendën e përballueshmërisë për të cilën mbi një milion njujorkezë votuan vetëm dy javë më parë”, thuhet në deklaratë.

Një takim midis Trump dhe Mamdani-t do t'u jepte fund muajve të tërë të armiqësisë midis dyshes, të cilët kanë shkëmbyer kritika të ashpra. Trump e ka cilësuar disa herë Mamdani-n si “komunist”. Në fazat e fundit të garës për kryetar bashkie, Trump kishte mbështetur ish-guvernatorin demokrat dhe kandidatin e pavarur Andrew Cuomo.

“Nëse kandidati komunist Zohran Mamdani fiton zgjedhjet për kryetar bashkie të qytetit të Nju Jorkut, është shumë e pamundur që unë të kontribuoj me fonde federale, përveç minimumit të kërkuar, për shtëpinë time të parë të dashur, për shkak të faktit se, si komunist, ky qytet dikur i madh ka ZERO shanse për sukses, apo edhe mbijetesë!”, ishte shprehur Trump vetëm dy ditë para ditës së zgjedhjeve.

Mamdani foli lidhur me mundësine e një takimi me Trump-in ku ndau dhe çështjet për të cilat do të bisedonin.

“Dua t’i flas hapur presidentit rreth asaj se çfarë do të thotë të mbrosh njujorkezët dhe mënyrën se si ata po përpiqen ta përballojnë këtë qytet, dhe sinqerisht, kostoja e jetesës është diçka që e kam dëgjuar vazhdimisht nga njujorkezët rreth arsyes pse votuan për Donald Trump", u shpreh kryebashkiaku në një intervistë. /CNA